13 (ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ បានដាក់ចេញបទបញ្ជាឱ្យគណៈកម្មាធិការជាតិគ្រប់គ្រងគ្រោះមហន្តរាយ ត្រៀមលក្ខណៈសម្បត្តិឆ្លើយតបនឹងគ្រោះជំនន់ទឹកភ្លៀង នៅតាមខេត្តជាប់ជាមួយព្រំដែនប្រទេសថៃ។ ជាពិសេសត្រៀមជម្លៀសពលរដ្ឋរកទីទួលសុវត្ថិភាព បញ្ចៀសហានិភ័យដល់អាយុជីវិត។
បទបញ្ជារបស់សម្តេចតេជោ ហ៊ុន សែន បានធ្វើឡើងបន្ទាប់ពីទឹកភ្លៀងដែលធ្លាប់ជាប់គ្នាក្នុងរយៈពេលប៉ុន្មានថ្ងៃមកនេះ បានបង្កឱ្យមានទឹកហូរធ្លាក់ពីភ្នំ និងពីប្រទេសថៃផង បង្កការជន់លិចនៅតាមតំបន់ទំនាបមួយចំនួន។
លោកទេសរដ្ឋមន្ត្រី គន់ គីម បានប្រាប់ Fresh News នៅព្រឹកថ្ងៃចន្ទ ទី២៩ ខែសីហា ឆ្នាំ២០២២នេះថា «សម្តេចតេជោ លោកបានដាក់បទបញ្ជាម៉ឺងម៉ាត់មកកាន់រូបខ្ញុំ ឱ្យចុះមកតាមខេត្តជាប់ព្រំដែន ហើយត្រូវត្រៀមលក្ខណៈដោះស្រាយបញ្ហាប្រឈមបង្កឡើងដោយទឹកជំនន់។ ជាពិសេសត្រូវបញ្ចៀសការគំរាមកំហែងដល់អាយុជីវិតរបស់ប្រជាពលរដ្ឋ»។
ក្នុងនាមជាសេនាធិការជួរមុខរបស់សម្តេចតេជោ ហ៊ុន សែន លើការងារគ្រប់គ្រងគ្រោះមហន្តរាយ លោកទេសរដ្ឋមន្ត្រី គន់ គីម បានអនុវត្តន៍តាមបទបញ្ជាយ៉ាងយកចិត្តទុកដាក់ខ្ពស់បំផុត។ ក្នុងរយៈពេលប៉ុន្មានថ្ងៃកន្លងមកនេះ លោកទេសរដ្ឋមន្ត្រី គន់ គីម បាននិងកំពុងចល័តនៅតាមបណ្តាខេត្តនានាជាប់ព្រំដែនថៃ ដើម្បីតាមដានស្ថានភាពទឹក និងចាត់ចែងរៀបចំមន្ត្រីគណៈកម្មការគ្រប់គ្រងគ្រោះមហន្តរាយតាមខេត្តនីមួយៗ ត្រៀមឆ្លើយតបទៅនឹងគ្រោះទឹកជំនន់នេះ។
ដោយឡែកនៅថ្ងៃម្សិលមិញនេះ លោកទេសរដ្ឋមន្ត្រី គន់ គីម បានចុះទៅកាន់ខេត្តព្រះវិហារ ដែលតំបន់មួយចំនួននៅក្នុងខេត្តនេះ កំពុងរង់ការជន់លិចដោយជំនន់ទឹកភ្លៀង។ លោកទេសរដ្ឋមន្ត្រី បានឱ្យដឹងថា ទឹកស្ទឹងសែន នៅទីរួមខេត្តព្រះវិហារ បន្ទាប់ពីមានភ្លៀងធ្លាក់ជោកជាំជិតមួយសប្តាហ៍កន្លងទៅនៅខាងភ្នំដងរែក ទឹកហូរចុះមកក្រោម ធ្វើឱ្យទឹកស្ទឹងសែនឡើងដល់កម្ពស់ ១១.៩៥ម៉ែត្រ លើសកម្រិតត្រូវប្រុងប្រយ័ត្ន ០.៤៥ម៉ែត្រ និងបានហូរចូលលំនៅដ្ឋានមួយចំនួន និងទីទំនាបនៅតាមមាត់ស្ទឹង កន្លែងខ្លះត្រឹមជង្គង់ កន្លែងខ្លះត្រឹមភ្លៅ តែមិនមានផលប៉ះពាល់ធ្ងន់ធ្ងរទេ។
បន្ថែមពីលើនោះ លោកទេសរដ្ឋមន្ត្រី គន់ គីម ក៏បានចុះទៅកាន់តំបន់លិចលង់ ពិនិត្យផ្ទាល់តាមខ្នងផ្ទះប្រជាពលរដ្ឋ ជាមួយការផ្តល់ដំបូន្មានមួយចំនួនទៅកាន់ប្រជាពលរដ្ឋត្រៀមលក្ខណៈសម្បត្តិជម្លៀសខ្លួនក្នុងករណីលិចលង់ខ្លាំង និងថែទាំទុកដាក់កូនចៅកុំឱ្យលេងទឹកដែលនាំឱ្យគ្រោះថ្នាក់ដល់អាយុជីវិតជាដើម។
លោកទេសរដ្ឋមន្ត្រី គន់ គីម ក៏បានណែនាំដល់អាជ្ញាធរខេត្តរួមជាមួយកងសង្គ្រោះលេខ៧២១ របស់កងពលធំលេខ៣ ត្រៀមកម្លាំង និងមធ្យោបាយសម្រាប់ជួយសង្គ្រោះប្រជាជនពេលរងគ្រោះ។
លោកទេសរដ្ឋមន្ត្រី គន់ គីម ចាប់តាំងពីត្រូវបានតែងតាំងជាអនុប្រធានទី១ នៃគណៈកម្មការគ្រប់គ្រង់គ្រោះមហន្តរាយនៅឆ្នាំ២០១៩មក លោកតែងតែបានធ្វើសកម្មភាពយ៉ាងសកម្មបំផុតនៅពេលមានគ្រោះធម្មជាតិ ជាពិសេសគ្រោះទឹកជំនន់។ ក្នុងនោះកាលពីគ្រោះទឹកជំនន់ឆ្នាំ២០២០ ក្នុងនាមជាសេនាធិការ និងជាភ្នែកច្រមុះរបស់សម្តេចតេជោ ហ៊ុន សែន លោកទេសរដ្ឋមន្ត្រីបានចុះគ្រប់គ្រងស្ថានការណ៍ដោយផ្ទាល់នៅខេត្តទិសពាយព្យនាពេលនោះ។
ក្នុងតួនាទីជាប្រតិបត្តិករលើការងារគ្រប់គ្រងគ្រោះមហន្តរាយនេះ លោកទេសរដ្ឋមន្ត្រី ទទួលបានការកោតសរសើរពីសំណាក់ប្រជាពលរដ្ឋ ចំពោះស្មារតីទទួលខុសត្រូវខ្ពស់លើការងារសង្គ្រោះពលរដ្ឋ និងដោះស្រាយផលប៉ះពាល់នានាបង្កដោយជំនន់ទឹកភ្លៀងនោះ៕
