អ្នកចាត់ការក្រុមគោព្រៃកម្ពុជា Honda រកបាន ១គ្រាប់ក្នុងការបង្ហាញខ្លួនដំបូង នៅលីគកំពូលលីទុយអានី

(វីលនៀស)៖ អ្នកចាត់ការទូទៅក្រុមបាល់ទាត់ជម្រើសជាតិកម្ពុជា លោក Keisuke Honda បានស៊ុតបញ្ចូលទីគូប្រជែង ១គ្រាប់ សម្រាប់ការបង្ហាញខ្លួនលើកដំបូងឲ្យក្លិប FK Suduva នៃក្របខណ្ឌលីគកំពូលប្រទេសលីទុយអានី (A Lyga) នៅរាត្រីថ្ងៃទី២៦ ខែកញ្ញា ឆ្នាំ២០២១។

គ្រាប់បាល់ដំបូងនៅក្លិបទី១១ ក្នុងអាជីពរបស់បុរសវ័យ ៣៥ឆ្នាំរូបនេះបានកើតឡើងក្នុងសប្ដាហ៍ទី២៨ ស្របពេលក្រុម FK Suduva បានយកឈ្នះក្រុម Banga Gargzdai ក្នុងលទ្ធផល ៤-០ ក្នុងជំនួបបើកឆាកជុំទី៤ នៃក្របខណ្ឌ A Lyga។ ១គ្រាប់របស់អ្នកចាត់ការទូទៅក្រុមគោព្រៃកម្ពុជាខាងលើ បានកើតឡើងនៅនាទី៦៤។

តាមរយៈជ័យជម្នះខាងលើនេះដែរបានធ្វើឲ្យអតីតក្រុមជើងឯក ៣សម័យ FK Suduva បន្ដគ្រងកំពូលតារាងបណ្ដោះអាសន្នដោយមាន ៦១ពិន្ទុ បន្ទាប់ពីប្រកួត ២៨លើក ឈ្នះ ១៩ ស្មើ ៤ និងចាញ់ ៥ តាមពីក្រោយដោយក្រុម Zalgiris ដែលមាន ៥៣ពិន្ទុក្នុងដៃ តែក្រុមជើងឯក ៨សម័យនេះ ទើបប្រកួតបាន ២៦លើកប៉ុណ្ណោះ។

គួរដឹងថា FC Suduva គឺជាក្លិបទី១១ ក្នុងចំណោម ៩ប្រទេសនៅអឺរ៉ុប ដែលអតីតសមាជិកក្រុមជម្រើសជាតិសាម៉ូរៃជប៉ុន Keisuke Honda បានប្រកបអាជីពក្រៅពីប្រទេសកំណើត ដោយអតីតតារាឆ្នើមរបស់ AC Milan ធ្លាប់លេងឲ្យក្លិបនៅប្រទេសហូឡង់ រុស្ស៊ី អ៉ីតាលី ម៉ិកស៊ិក អូស្ត្រាលី ប្រេស៊ីល ព័រទុយហ្គាល់ និងអាស៊ែបៃហ្សង់ជាដើម។

ទន្ទឹមជាមួយការមមាញឹកជួយក្លិបថ្មីនៅលីគកំពូលនៃប្រទេសលីទុយអានី Honda នៅមានបេសកកម្មដ៏សំខាន់ក្នុងការដឹកនាំក្រុមជម្រើសជាតិកម្ពុជា បន្ទាប់ពីលោកបានចុះកុងត្រាជាមួយសហព័ន្ធរហូតដល់ស៊ីហ្គេម ឆ្នាំ២០២៣។ ពិសេសចុងឆ្នាំនេះ កម្ពុជាមានការប្រកួតអន្ដរជាតិធំៗ៣ គឺការប្រកួតជម្រុះពានរង្វាន់ AFC Asian Cup China 2023-Play Off និងពានរង្វាន់ AFC U-23 Asian Cup 2022 នាខែតុលា រួមទាំងការប្រកួតពានរង្វាន់ AFF Suzuki Cup 2020 នាខែធ្នូ ឆ្នាំ២០២១ ខាងមុខទៀតផង៕