ស្វាយរៀង យកបាន ៣ពិន្ទុបន្ថែម ក្រោយវាយបកឈ្នះទ័ពវិញក្នុងលទ្ធផល ៣-២ នៅចុងម៉ោង

(ភ្នំពេញ)៖ សម្រាប់លទ្ធផលការប្រកួតពានរង្វាន់លីគកំពូលកម្ពុជា ឆ្នាំ២០២១ សប្តាហ៍ទី ១២នេះ ក្រុមម្ចាស់ផ្ទះព្រះខ័នរាជស្វាយរៀងរកបាន ៣ពិន្ទុបន្ថែម បន្ទាប់ពីយកឈ្នះក្រុមភ្ញៀវកងយោធពលខេមរភូមិន្ទ នៅចុងម៉ោងក្នុងលទ្ធផល ៣-២ នៅថ្ងៃអាទិត្យ ទី០៥ ខែកញ្ញា ឆ្នាំ២០២១។

ទាក់ទងទៅការប្រកួតរបស់ក្រុមទាំងពីរ ចូលដល់តង់ទី១ គ្មានគ្រាប់បាល់ស៊ុតបញ្ចូលទីគ្នាទេ លុះចូលដល់តង់ទី២ មិនទាន់បានក្តៅសាច់ផង ក្រុមភ្ញៀវកងយោធពលខេមរភូមិន្ទ បាននាំមុខមុនដល់ទៅ ២គ្រាប់ និងបានទាត់បញ្ចូលដោយកីឡាករ YUTA KIKUCHI ពាក់លេខ១៣ នៅនាទីទី៥១ និងគ្រាប់ទី២ របស់កីឡាករ ណារ៉ុង កក្កដា ពាក់លេខ១១ នៅនាទីទី៦២ ក្រោយមកម្ចាស់ផ្ទះស្វាយរៀងបានវាយបកយក ៣គ្រាប់វិញ និងបានស៊ុតបញ្ចូលទីដោយកីឡាករ MIGUEL ANGEL JUNCO MARTINEZ ពាក់លេខ៩ រកបាន ៣គ្រាប់ម្នាក់ឯងនៅនាទីទី៧៦ ៨១ និងនាទី៩០+៣ និងធ្វើឲ្យក្រុមទទួលបានជ័យជម្នះផងដែរ។

គួរដឹងផងដែរថា ព្រះខ័នរាជស្វាយរៀងកាលសប្តាហ៍ទី១១ បានលេងចាញ់ក្រុមភ្ញៀវបឹងកេត នៅក្នុងលទ្ធផល ២-១ កាលពីថ្ងៃអាទិត្យ ទី០១ ខែសីហា កន្លងទៅនៅក្នុងទឹកដីរបស់ខ្លួន។ ស្វាយរៀងឆ្លងកាត់ ១១ប្រកួតកន្លងមកនេះ ឈ្នះ៧ដង ស្មើ១ដង និងចាញ់៣ដង បានឡើងមកឈរនៅចំណាត់ថ្នាក់លេខ ២វិញ និងមាន ២២ពិន្ទុ។

ចំណែកឯកងយោធពលខេមរភូមិន្ទ កាលសប្តាហ៍ទី១១វិញ ក៏បានលេងស្មើជាមួយ ក្រុមនគរបាលជាតិ នៅក្នុងលទ្ធផល ១-១ កាលពីថ្ងៃសៅរ៍ ទី៣១ ខែកក្កដា កន្លងទៅ។ កងយោធពលខេមរភូមិន្ទឆ្លងកាត់១១ប្រកួតកន្លងមកនេះដូចគ្នា ឈ្នះ៤ដង កិច្ចសន្យាកិច្ចសន្យា៤ដង និងចាញ់៣ដង បានឈរនៅចំណាត់ថ្នាក់លេខ៧ និងមាន ១៦ពិន្ទុ៕