WHO សម្រេចដាក់ឈ្មោះផ្លូវការ ឲ្យវីរុសកូវីដ-១៩បំប្លែងថ្មីទាំងអស់ ដើម្បីចៀសវាងការយកឈ្មោះប្រទេស ឬតំបន់មកប្រើប្រាស់

(ហ្សឺណែវ)៖ អង្គការសុខភាពពិភពលោក (WHO) នៅថ្ងៃចន្ទសប្ដាហ៍នេះបានប្រកាសថា «វីរុស COVID-19 បំប្លែងខ្លួនថ្មី» ទាំងអស់ដែលត្រូវបានរកឃើញនាពេលកន្លងមក នៅក្នុងប្រទេសមួយចំនួន ត្រូវបានដាក់ឈ្មោះសម្គាល់ទៅតាមភាសាក្រិក ដើម្បីងាយស្រួលក្នុងការហៅ និងចៀសវាងការយកឈ្មោះតំបន់ ឬប្រទេសមកសម្គាល់វីរុសបំប្លែងថ្មីទាំងនោះ។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នៅព្រឹកថ្ងៃអង្គារ ទី០១ ខែមិថុនា ឆ្នាំ២០២១។

បើតាមអង្គការសុខភាពពិភពលោក នៅក្រោមប្រព័ន្ធកំណត់ឈ្មោះថ្មីនេះ វីរុស COVID-19 បំប្លែងខ្លួនថ្មីមានប្រភពដើមនៅចក្រភពអង់គ្លេស នឹងត្រូវប្ដូរឈ្មោះមក អាល់ហ្វា (Alpha) រីឯវីរុសបំប្លែងខ្លួនថ្មីនៅឥណ្ឌា មានឈ្មោះថា ឌែលតា (Delta) និងវីរុសបំប្លែងខ្លួនថ្មីអាហ្រ្វិកខាងត្បូង មានឈ្មោះថា បេតា (Beta)។

ខាងក្រោមនេះគឺជាឈ្មោះសម្គាល់របស់វីរុសបំប្លែងខ្លួនថ្មីជាភាសាក្រិក៖

* វីរុបំប្លែងខ្លួនថ្មីនៅចក្រភពអង់គ្លេស (B.1.1.7) ប្ដូរឈ្មោះមកជា អាល់ហ្វា (Alpha)។
* វីរុសបំប្លែងខ្លួនថ្មីនៅអាហ្វ្រិកខាងត្បូង ( B.1.351) ប្ដូរឈ្មោះមកជា បេតា (Beta)។
* វីរុសបំប្លែងខ្លួននៅថ្មីប្រេស៊ីល ( P.1) ប្ដូរឈ្មោះមកជា ហ្គាំម៉ា (Gamma)
* វីរុសបំប្លែងខ្លួនថ្មីនៅឥណ្ឌា (B.1.617.2) ប្ដូរឈ្មោះមកជា ឌែលតា (Delta)។
* វីរុសបំប្លែងខ្លួនថ្មីនៅអាមេរិក (/ B.1.427 / B.1.429) ប្ដូរឈ្មោះមកជា អ៊ែបស៊ីឡុន (Epsilon)។
* វីរុសបំប្លែងខ្លួនថ្មីនៅប្រេស៊ីល ( P.2) ប្ដូរឈ្មោះមកជា ហ្សេតា (Zeta)។
* វីរុសបំប្លែងខ្លួនថ្មី (B.1.525) ប្ដូរឈ្មោះមកជា អេតា (Eta)។
* វីរុសបំប្លែងខ្លួនថ្មីនៅហ្វីលីពីន ( P.3) ប្ដូរមកជា សេតា (Theta)។
* វីរុសបំប្លែងខ្លួនថ្មីនៅអាមេរិក (B.1.526) ប្ដូរមកជា អ៉ីយ៉ូតា (Iota)។
* វីរុសបំប្លែងនៅឥណ្ឌា ( B.1.617.1) ប្ដូរមកជា កាបប៉ា (Kappa)។

គួរបញ្ជាក់ថា ក្រោយការកំណត់ឈ្មោះខាងលើនេះរួចរាល់ WHO ក៏បានអំពាវនាវផងដែរ ឲ្យរដ្ឋាភិបាលប្រទេសនានា រួមទាំងបណ្តាញសារព័ត៌មានទាំងអស់លើពិភពលោក ងាកមកប្រើប្រាស់ឈ្មោះសម្គាល់ថ្មីៗនេះវិញ ព្រមទាំងបោះចោលទម្លាប់នៃការហៅឈ្មោះ វីរុស COVID-19 បំប្លែងខ្លួនថ្មី ដែលត្រូវបានរកឃើញនៅតាមប្រទេស ឬតំបន់៕