45 បាល់ទាត់៖ កីឡដ្ឋានបាល់ទាត់ធំជាងគេនៅអឺរ៉ុប Camp Nou របស់ក្លិបអេស្ប៉ាញ FC Barcelona បានប្រែក្លាយទៅជាមណ្ឌលចាក់វ៉ាក់សាំងប្រឆាំង Covid-19 ក្នុងយុទ្ធនាការចាក់វ៉ាក់សាំងជូនប្រជាពលរដ្ឋអេស្ប៉ាញ។
Barcelona បានបញ្ជាក់ថា កីឡដ្ឋាន Camp Nou នឹងផ្តល់វ៉ាក់សាំងជូនប្រជាពលរដ្ឋក្នុងតំបន់ប្រមាណ ៧៥០០នាក់ក្នុងរយៈពេល ៣សប្តាហ៍ចាប់ពីថ្ងៃព្រហស្បតិ៍ម្សិលមិញ។ ការចាក់វ៉ាកសាំងនឹងត្រូវធ្វើឡើងនៅក្នុងសាល Sala Berlin ក្នុងកីឡដ្ឋាន Camp Nou។ សមាជិកក្រុមការងារនៃក្លិប Barcelona ក៏នឹងត្រូវទទួលវ៉ាក់សាំងផងដែរ។ មន្ត្រីសុខាភិបាលក្នុងតំបន់ Catalan មានគោលដៅផ្តល់វ៉ាក់សាំងអោយបាន ៧០% នៃចំនួនប្រជាពលរដ្ឋក្នុងតំបន់ និងមានគោលដៅចាក់អោយបាន ៥០ម៉ឺននាក់ក្នុងមួយសប្ដាហ៍។ បច្ចុប្បន្នអេស្ប៉ាញជាប្រទេសដែលមានចំនួនអ្នកករណីឆ្លង Covid-19 ច្រើនចំណាត់ថ្នាក់លេខ ១១ ដោយមានករណីឆ្លងសរុបជាង ៣លានកន្លះ និងមានករណីស្លាប់ជិត ៨ម៉ឺននាក់៕
