30 អាមេរិក៖ បុរសវ័យ ២១ឆ្នាំម្នាក់រងការចោទប្រកាន់រួចហើយ កាលពីថ្ងៃអង្គារម្សិលមិញក្រោយបាញ់សម្លាប់មនុស្ស ១០នាក់នៅផ្សារទំនើបក្នុងរដ្ឋកូឡូរ៉ាដូ សហរដ្ឋអាមេរិក ស្របពេលដែលហេតុការណ៍បាញ់ប្រហារនេះ ជំរុញឲ្យមានការអំពាវនាវថ្មីក្នុងការគ្រប់គ្រងអាវុធ។
ជនសង្ស័យឈ្មោះ អាម៉ាដ អាល់អាលីវី អាលីហ្សសា កំពុងស្ថិតនៅក្នុងមន្ទីរពេទ្យក្រោយត្រូវគ្រាប់កាំភ្លើង ពេលបាញ់តបតជាមួយក្រុមសមត្ថកិច្ច បន្ទាប់ពីវាយប្រហារមកលើផ្សារទំនើប King Soopers ស្ថិតក្នុងស្រុកប៊ូលដឺ និងស្ថិតនៅចម្ងាយ ៥០គីឡូម៉ែត្រភាគពាយព្យរដ្ឋធានីដេវវើ កាលពីរសៀលថ្ងៃចន្ទ។ យោងតាមលិខិតចាប់ខ្លួនបានឲ្យដឹងថា លោក អាលីហ្សា បានទិញអាវុធកាលពីថ្ងៃទី១៦ ខែមីនា ឆ្នាំ២០២១ កន្លងទៅ រយៈពេល ៦ថ្ងៃប៉ុណ្ណោះមុនពេលរូបលោកបើកការវាយប្រហារ ប៉ុន្តែគេមិនទាន់ដឹងច្បាស់នោះទេ ពីទីកន្លែងដែលលោកបានទិញអាវុធមួយដើមនេះ។ លោក ម៉ៃឃើល ឌូកហ្គឺធី មេធាវីស្រុកប៊ូលដឺបាននិយាយថា ក្រុមស៊ើបអង្កេតមិនទាន់បញ្ចេញឲ្យដឹងពីមូលហេតុ នៃការបាញ់ប្រហារនេះឡើយ ប៉ុន្តែពួកគេជឿថា លោក អាលីហ្សា គឺជាជនដៃដល់តែម្នាក់គត់។
ទីភ្នាក់ងារព័ត៌មាន AP បានរាយការណ៍ថា មន្ត្រីពង្រឹងច្បាប់ដែលបានរៀបរាប់ពីករណីបាញ់ប្រហារនេះ បានលើកឡើងពីសម្តីគ្រួសារជនសង្ស័យថា លោក អាលីហ្សា មានជំងឺផ្លូវចិត្ត ដែលរួមទាំងការបាត់ស្មារតីផងដែរ។ ខណៈពេលនោះដែរ ប្រធានាធិបតីសហរដ្ឋអាមេរិក ចូ បៃដិន សម្ដែងនូវការអាណិតអាសូរយ៉ាងខ្លាំង ដល់គ្រួសារជនរងគ្រោះក្នុងហេតុការណ៍បាញ់ប្រហារនេះ ក្រោយកាលពីសប្ដាហ៍មុន រូបលោក និងលោកស្រីអនុប្រធានាធិបតី កាម៉ាឡា ហារីស បាននិយាយពីការប្រកាន់ជាតិសាសន៍នោះ៕
