51 (ភ្នំពេញ)៖ ក្លិបព្រះខ័នរាជស្វាយរៀង បានប្រកាសផ្ទេរខ្សែបម្រើការពារ សំអឿន ពិដោរ ទៅក្លិបណាហ្គាវើលដ៏ម្នាក់ទៀតហើយ ក្រោមលក្ខខណ្ឌខ្ចីជើង សម្រាប់រដូវកាលថ្មី ឆ្នាំ២០២១ ខាងមុខ។
នេះគឺជាដំណឹងដ៏រសើបមួយ សម្រាប់អ្នកគាំទ្រក្លិបព្រះខ័នរាជស្វាយរៀង ក្រោយពួកគេប្រកាស អំពីការចាកចេញរបស់កីឡាករមានបទពិសោធជាបន្ដបន្ទាប់ ជាក់ស្ដែងកន្លងមក កីឡាករ នេន សុធារដ្ឋ និង ណុប តុលា ក៏បានផ្ទេរចូលក្លិបណាហ្គាវើលដ៏ដែរ បន្ទាប់ពីចែកផ្លូវជាមួយក្រុមជើងឯករងលីគឆ្នាំ២០២០ នេះ។
កីឡាករផ្ដើមអាជីពបាល់ទាត់តាំងពីវ័យ ១១ឆ្នាំ សំអឿន ពិសោរ ត្រូវបានដំឡើងពីក្រុមយុវជនមកលេងក្រុមធំព្រះខ័នរាជស្វាយរៀង នៅឆ្នាំ២០១៣ ហើយរយៈពេល ៨រដូវកាលកន្លងមក អតីតសមាជិកក្រុមជម្រើសជាតិកម្ពុជារូបនេះ បានរួមចំណែកជួយក្រុមឈ្នះពានសម្ដេចតេជោ ហ៊ុន សែន ២ដង និងលើកពានលីគកំពូលកម្ពុជា ២ដងដែរ។
គួរដឹងថា ក្រោយចប់រដូវកាលឆ្នាំ២០២០ មកទល់ពេលនេះ ព្រះខ័នរាជស្វាយរៀង បានប្រកាសអំពីការចាកចេញរបស់សមាជិកចំនួន ៨រូបហើយ ក្នុងនោះមាន ២រូប បានចាកចេញក្រោមលក្ខខណ្ឌខ្ចីជើង នារដូវកាលឆ្នាំ២០២១ រួមមានអ្នកចាំទី អោម ឧត្តម ផ្ទេរទៅវិសាខា និង សំអឿន ពិដោរ ផ្ទេរទៅណាហ្គាវើលដ៏។
រីឯ ៦រូបទៀត គឺមានកីឡាករ នេន សុធារ័ត្ន និង ណុប តុលា ផ្ទេរទៅណាហ្គាវើលដ៏, ឈិន ឈឿន ផ្ទេរទៅក្លិបចាស់កងយោធពលខេមរភូមិន្ទ ព្រមទាំងកីឡាករបរទេស ៣រូប គឺខ្សែការពារអាមេរិក Jonny Campbell, ខ្សែប្រយុទ្ធប្រេស៊ីល Pedro Agusto និងកីឡាករ Thiago ដែលមិនទាន់ដឹងពីតម្រុយក្លិបថ្មីនៅឡើយ៕
