125 (តែលអាវីវ)៖ ក្រុមអ្នកស្រាវជ្រាវចិន និងអ៉ីស្រាអែលបានបង្កើត ប្រព័ន្ធបញ្ញាសិប្បនិមិត្ត (AI) ដ៏ពិសេសមួយ សម្រាប់វិភាគមើលទៅលើខ្យល់ដង្ហើម ដើម្បីស្វែងរកវត្តមាន COVID-19 ឲ្យបានឆាប់រហ័ស។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នៅព្រឹកថ្ងៃសៅរ៍ ទី២២ ខែសីហា ឆ្នាំ២០២០។
យោងតាមសេចក្តីថ្លែងការណ៍នៅថ្ងៃសុក្រសប្តាហ៍នេះ របស់វិទ្យាស្ថានបច្ចេកវិទ្យាអ៉ីស្រាអែល ធិចនៀន (Technion) ឧបករណ៍វិភាគខ្យល់ដង្ហើមនោះ ត្រូវបានអភិវឌ្ឍឡើងដោយ Technion ក្រោមការសហការជាមួយសាកលវិទ្យាល័យបច្ចេកវិទ្យា-វិទ្យាសាស្រ្ត សាកលវិទ្យាល័យវេជ្ជសាស្រ្ត និងមន្ទីរពេទ្យសរុបចំនួន ០៣ ស្ថិតក្នុងទីក្រុង ហឺហ្វី (Hefei) នៃខេត្តអានហ៊ុយ (Anhui) ភាគខាងកើតប្រទេសចិន។
វិទ្យាស្ថាន Technion បានលើកឡើងថា ឧបករណ៍ខាងលើនេះ គឺសមស្របទៅតាមតម្រូវការនៃមធ្យោបាយដែលងាយស្រួល មានតម្លៃធូរថ្លៃ និងប្រព្រឹត្តទៅបានឆាប់រហ័ស សម្រាប់ការធ្វើតេស្តរកអ្នកឆ្លង COVID-19 ជាពិសេសក្រុមអ្នកមិនទាន់ចេញរោគសញ្ញា ឬក៏ក្រុមអ្នកមិនចេញរោគសញ្ញាតែម្តង។
គួរជម្រាបថា ឧបករណ៍ដដែលនេះ អាចយកទៅប្រើប្រាស់សម្រាប់ការពិនិត្យ នៅតាមអាកាសយានដ្ឋាន ផ្សារទំនើប និងកន្លែងសាធារណៈដទៃទៀត ដែលអាចបង្កហានិភ័យខ្ពស់ នៃការឆ្លងរាលដាលក្នុងសហគមន៍។ ក្រៅពីនេះប្រព័ន្ធ AI របស់វាក៏អាចកែសម្រួល ដើម្បីយកទៅប្រើប្រាស់ សម្រាប់ការពិនិត្យរកជំងឺឆ្លងផ្សេងៗទៀតផងដែរ៕
