59 (ក្រចេះ)៖ លោក ម៉ុក ពន្លក នាយខណ្ឌរដ្ឋបាលជលផល ខេត្តក្រចេះ បានព្រមានចាត់វិធានការច្បាប់ទៅលើអាជីវករទាំងឡាយណាដែលមិនព្រមស្ដាប់ការណែនាំ របស់មន្រ្តីជំនាញ ហើយនៅតែបន្តទិញ លក់ប្រភេទត្រីដែលមានដូចមន្ត្រីជំនាញបានអប់រំណែនាំ និងធ្វើកិច្ចសន្យារួចហើយនោះ។
ការព្រមានចាត់វិធានការច្បាប់បែបនេះ របស់លោក ម៉ុក ពន្លក បានធ្វើឡើងនៅព្រឹកថ្ងៃទី០៤ ខែសីហា ឆ្នាំ២០២០នេះ នៅក្នុងឱកាសលោកបានសហការជាមួយគណៈបញ្ជាការឯកភាពក្រុង ដឹកនាំដោយលោក សេង ភីណា អភិបាលរងក្រុងក្រចេះ ដឹកនាំកម្លាំង ចុះណែនាំ អប់រំផ្សព្វផ្សាយដល់បងប្អូនអាជីវករលក់ត្រី ដោយហាមមិនឱ្យទិញ លក់ និងដឹកជញ្ជូនប្រភេទត្រីដែលកំពុងរងគ្រោះ ជិតផុតពូជ និងនេសាទដោយឧបករណ៍ខុសច្បាប់។
លោក ម៉ុក ពន្លក បានឱ្យដឹងថា ប្រភេទធនធានជលផលដែលកំពុងរងគ្រោះជិតផុតពូជមានចំនួន ២៩ប្រភេទ ដែលមានឈ្មោះដូចនៅលើរូបផ្ទាំងស្ទីកឃ័រ ដែលមន្រ្តីជំនាញបានចែកជូនដល់បងអាជីវករ និងបិទនៅតាមទីផ្សារ។ហើយត្រីដែលមានលក់លើទីផ្សារ ខេត្តក្រចេះប្រចាំថ្ងៃដែលដែលត្រូវហាមឃាត់រួមមាន៖ ត្រីក្របី, ត្រីត្រសក់, ត្រីគល់រាំង, ត្រីរមាស, ត្រីត្រចៀកដំរី, អណ្ដើកទឹក និងកន្ទាយក្បាលកង្កែប ជាដើម។
លោកបានព្រមានយ៉ាងដូច្នេះថា «បងប្អូនអាជីវករទៀតថា បើបងប្អូនដឹងហើយ មិនព្រមស្ដាប់ការណែនាំ របស់មន្រ្តីជំនាញ ហើយនៅតែបន្តទិញ លក់ប្រភេទត្រីដែលមានដូចមន្ត្រីជំនាញបានអប់រំណែនាំ ធ្វើកិច្ចសន្យានោះ លើកក្រោយសមត្ថកិច្ចនឹងធ្វើការចាប់រឹបអូសយក ហើយអ្នកលក់ និងមានទោសថែមទៀត»។
លោក ម៉ុក ពន្លក បានគូសបញ្ជាក់ថា នេះជាជំហ៊ានទី១៖ ដែលសមត្ថកិច្ចយើងចុះអប់រំ ផ្សព្វផ្សាយ ធ្វើកិច្ចសន្យាឱ្យបញ្ឈប់ ប្រសិនបើនៅតែមិនព្រមគោរពតាមការណែនាំទេ ជំហ៊ានទី២៖ លោកនឹងដឹកនាំមន្រ្តីជំនាញសហការជាមួយអាជ្ញាធរ ចុះត្រួតពិនិត្យចាប់បង្រ្កាប ព្រមទាំងធ្វើការវះកាត់ត្រីពិនិត្យមើលថាបើកមានបាក់ឆ្អឹង ឬជាំឈាម គឺជាប្រភេទត្រីខុសច្បាប់ដោយបានមកពីឧបករណ៍ឆក់ សមត្ថកិច្ចនឹងធ្វើការចាប់រឹកអូសយក ហើយម្ចាស់ក៏ត្រូវមានទោសតាមច្បាប់ស្តីពីជលផល៕
