សម្តេច ស ខេង អញ្ជើញបិទ និងផ្តល់ពានរង្វាន់ជូនទូកជាប់ចំណាត់ថ្នាក់នៅខេត្តបាត់ដំបង

(បាត់ដំបង)៖ រយៈពេល២ថ្ងៃ ចាប់ពីថ្ងៃទី៩-១០ ខែតុលា ឆ្នាំ២០២២ រដ្ឋបាលខេត្តបាត់ដំបង បានរៀបចំពិធីអុំទូក សំពះព្រះខែ បណ្តែតប្រទីប នៅថ្ងៃបុណ្យចេញព្រះវស្សា តាមដងស្ទឹងសង្កែក្រុងបាត់ដំប ត្រូវបានបិទ និងប្រកាសជ័យ

ជម្នះដល់កីឡាករដែលទទួលបានលាភី។

ពិធីបិទនេះបានធ្វើឡើងក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តបាត់ដំបង និងប្រតិភូអមដំណើរ, លោក សុខ លូ អភិបាលខេត្តបាត់ដំបង, លោក អ៊ុយ រី ប្រធានក្រុមប្រឹក្សាខេត្ត និងមានការចូលរួមពីសមាជិក រដ្ឋសភា អ្នកតំណាងរាស្រ្ត ប្រធានក្រុមការងាររាជរដ្ឋាភិបាលចុះជួយមូលដ្ឋានក្រុងស្រុកឃុំសង្កាត់ រដ្ឋបាលក្រុងស្រុក មន្រ្តីរាជការ
កងកម្លាំង និងប្រជាពលរដ្ឋរាប់ម៉ឺននាក់ចូលរួមផងដែរ។

ថ្លែងក្នុងពិធីបិទការប្រកួតអុំទូក នៅល្ងាចថ្ងៃទី១០ ខែតុលា ឆ្នាំ២០២២ លោក សុខ លូ អភិបាលខេត្តបាត់ដំបង បានថ្លែងចូលរួមអបអរសាទរសប្បាយរីករាយ ជាមួយបងប្អូនប្រជាពលរដ្ឋមកពីគ្រប់ទិសទី ដែលបានមកលេងកំសាន្តក្នុងពិធីដ៏អធិកអធមនេះ បន្ទាប់ពីខកខានរយៈពេលកន្លងមក ដោយសារតែគ្រោះទឹកជំនន់ និងវិបត្តិជំងឺកូវីដ១៩។

លោកអភិបាលបន្តថា បច្ចុប្បន្នដោយការខិតខំយកចិត្តទុកដាក់គិតគូរខ្ពស់ពីប្រមុខរាជរដ្ឋាភិបាលកម្ពុជា ក្នុងការស្វែងរកវ៉ាក់សាំងចាក់ជូនបងប្អូនប្រជាពលរដ្ឋស្ទើរតែ១០០ភាគរយហើយនោះ ធ្វើឲ្យជំងឺដ៏កាចសាហាវមួយនេះ ស្ទើរតែបាត់ទាំងស្រុងនៅកម្ពុជារបស់យើង។

លោក សុខ លូ បានថ្លែងបន្តទៀតថា «កក្តាទាំងអស់នេះហើយធ្វើឲ្យប្រទេសកម្ពុជាយើង បានធ្វើឲ្យសេដ្ឋកិច្ចបានងើបឡើងវិញជាបន្តបន្ទាប់លើគ្រប់វិស័យ ក្រោមការយកចិត្តទុកដាក់ខ្ពស់ពីសម្តេចតេជោ ហ៊ុនសែន នាយករដ្ឋមន្រ្តីនៃកម្ពុជា ធ្វើឲ្យប្រជាពលរដ្ឋប្រកបមុខរបរកស៊ីជាធម្មតានឹងមានជីវភាពធូរធា សំបូរសប្បាយ ឡើងវិញដោយមិនមានការបារម្មណ៍នឹងវិបត្តិជំងឺកូវីដដូចមុនទៀតឡើយ»។

ទោះបីជាបច្ចុប្បុន្ននេះស្ថានភាពជំងឺកូវីដ១៩ មានការធូរស្រាលយ៉ាងណាក្តី លោក សុខ លូ នៅតែបន្តអំពាវនាវឱ្យបងប្អូនប្រជាពលរដ្ឋដែលមកទស្សនាកំសាន្តនៅក្នុងឱកាសនៃពិធីបុណ្សអុំទូកនេះ ត្រូវតែអនុវត្តឲ្យខ្ជាប់ខ្ជួនវិធានការ របស់ក្រសួងសុខាភិបាល។

ជាមួយគ្នានេះ លោក សុខ លូ បានកោតសរសើរ ដល់កីឡាករអុំទូកទាំងអស់ ដែលរយ:ពេល២ថ្ងៃនេះ បានបញ្ចេញអស់នូវថាមពល បង្កការសប្បាយជូនប្រជាពលរដ្ឋ ពិសេសខំដណ្តើមយកពានរង្វាន់ជូនក្រុមរបស់ខ្លួនប្រកប
ដោយមោទកភាព។ លោកអភិបាលខេត្ត ក៏បានផ្តាំផ្ញើរដល់ក្រុមកីឡាករទាំងអស់ ត្រូវបន្តហ្វឹកហាត់សមតទៅទៀតឲ្យបានប្រសើរសម្រាប់ត្រៀមការប្រណាំងនៅឆ្នាំក្រោយៗទៀត។

សម្តេចក្រឡាហោម ស ខេង ថ្លែងក្នុងពិធីបិទ និងប្រកាសលទ្ធផលជ័យលាភីនៃការប្រកួតអុំទូកនៅខេត្តបាត់ដំបងនៅអង្គពិធីថា បងប្អូនកីឡាករកីឡាការិនី បានសម្ដែងក្ដីរីករាយដែលមានឱកាសជាថ្មីទៀតបានចូលរួមទស្សនា និងគាំទ្រការប្រារព្ធពិធីប្រណាំងទូកខេត្តបាត់ដំបង ដែលមានប្រជាពលរដ្ឋជាចំណុះទូក និងប្រជាពលរដ្ឋជាអ្នកមកលេងកំសាន្តយ៉ាងច្រើនកុះករនាឱកាសនេះ។

សម្ដេចក៏បានថ្លែងអំណរគុណ អស់លោក លោកស្រី ជាថ្នាក់ដឹកនាំក្រុមការងារ អាជ្ញាធរខេត្ត ក្រុង ស្រុក ឃុំ សង្កាត់ សប្បុរជនទូទៅ ដែលបានចូលរួមគាំទ្ររដ្ឋបាលខេត្តបាត់ដំបង នៅក្នុងការរៀបចំព្រឹត្តិការណ៍នេះ ពិសេសបានចូលរួមផ្ដល់ការគាំទ្រជាថវិកា សម្លៀកបំពាក់ ស្បៀងអាហារ ភេសជ្ជៈដល់ចំណុះទូកដែលបានចូលរួមប្រណាំងញាំងបរិយាកាសរីករាយជូនប្រជាពលរដ្ឋ។

នាឱកាសនោះ សម្ដេចក្រឡាហោម ស ខេង ក៏ថ្លែងទាញចំណាប់អារម្មណ៍អង្គពិធីអំពីសក្ដានុពលស្ទឹងសង្កែ ដែលមិនត្រឹមតែជាប្រភពទឹកសម្រាប់បង្ហូរទៅតាមប្រឡាយនានាបម្រើឱ្យពលរដ្ឋធ្វើស្រែប្រាំង ប៉ុណ្ណោះទេ ប៉ុន្តែសម្បត្តិសាធារណៈមួយនេះ ជាផ្នែកមួយយ៉ាងសំខាន់ក្នុងការលើកមុខមាត់ក្រុងបាត់ដំបងដូចដែលបទចំរៀងសម័យដើមបានរៀបរាប់ ព្រមទាំងលើកស្ទួយវិស័យទេសចរណ៍ផងដែរ។

សម្ដេចក៏អំពាវនាវរដ្ឋបាលខេត្ត និងប្រជាពលរដ្ឋទាំងក្រុងបាត់ដំបង និងបណ្ដាស្រុកផ្សេងៗជាប់ស្ទឹងសង្កែ សូមខិតខំថែរក្សាបរិស្ថាន អនាម័យ និងកែច្នៃបន្ថែមទៀត ដើម្បីលើកកម្ពស់សោភ័ណ្ឌភាពក្រុងបាត់
ដំបង ពិសេសស្ទឹងសង្កែនេះតែម្ដង។ សម្ដេចលើកទឹកចិត្តឱ្យបន្តរៀបចំសួនច្បារ និងដាំដើមឈើឱ្យបានច្រើន ទាំងដងស្ទឹង និងតាមបណ្ដោយដងផ្លូវ ដើម្បីបង្កើនបរិយកាសបៃតង។

សម្រាប់ព្រឹត្តិការណ៍ប្រណាំងទូក បណ្ដែតប្រទីប ខេត្តបាត់ដំបង នាឆ្នាំ២០២២នេះ ជ័យលាភីលេខ១ ផ្នែកទូកអុំបុរសខ្នាតអន្តរជាតិ បានទៅលើទូក «បាណន់មានជ័យបារមីតាដំបងដែក» លេខ២ បានទៅ
លើទូក «សង្កែសជ័យ» លេខ៣ បានទៅលើទូក «ផ្សោតមានជ័យដែនដីសុវណ្ណ» និងទូកលេខ៣ស្ទួន បានទៅលើទូក «អនុវិទ្យាល័យព្រែកនរិន្ទសជ័យ»។

ចំណែកជ័យលាភីទូកខ្លីប្រពៃណីផ្នែកបុរសចំណុះ២២នាក់ ក្របខណ្ឌអក្សរ គ លេខ១ បានទៅលើទូក «យុវជនបាត់ដំបងសជ័យបារមីគង្គា» លេខ២បានទៅលើទូក «បញ្ញវ័ន្តក្មេងវត្តបាត់ដំបងបារមីតេជោសែន» ទូកលេខ៣ បានទៅលើទូក «ហនុរាជសីសែនជ័យបារមីតេជោ» ទូកលេខ៣ស្ទួន បានទៅលើទូក «មហាពាណិជ្ជឧស្សាហ៍មានជ័យ» ។

ទូកខ្លីប្រពៃណីបុរសផ្នែកអក្សរ ខ លេខ១ គឺទូក «តាតាំងមានជ័យបារមីវត្តសង្កែវាល» លេខ២ បានទៅលើទូក «ស្រស់ពិស័យបារមីលោកតាវាំង» លេខ៣បានទៅលើទូករតនៈសំឡូតមានជ័យ លេខ៣
ស្ទួន បានទៅលើទូក «សាធារណការសជ័យបារមីកំចាយមារ»។

ទូកខ្លីប្រពៃណីផ្នែកបុរសក្របខណ្ឌអក្សរ ក លេខ១ បានទៅលើទូក «សុវណ្ណមានជ័យបារមីវត្តសង្កែវាល» លេខ២ បានទៅលើទូក«កាកបាទក្រហមសជ័យបារមីតេជោ» លេខ៣ បានទៅលើទូក «សង្គមកិច្ចសែនជ័យបារមីមានរិទ្ធ» លេខ៣ស្ទួន បានទៅលើទូក «សុខាភិបាលសជ័យបារមីដំបងក្រញ៉ូង»។

សម្រាប់ទូកងវែងប្រពៃណីវែងខ្នាតបុរសចំណុះ៦៨នាក់ឡើងទៅ ដែលជាទូកផែនពិសេស គឺជ័យលាភីលេខ១ បានទៅលើទូក «នរិន្ទរង្សីសជ័យពិចិត្របុត្រ» លេខ២ បានទៅលើទូក «បាត់ដំបងខនស៊ីមេនមានជ័យបារមីភ្នំដូននាយ» លេខ៣ បានទៅលើទូក «សុវណ្ណភត្រាបាត់ដំបងសជ័យ» និងលេខ៣ស្ទួន បានទៅលើទូក «ពិសីមានជ័យបារមីស្រីស្អាត»៕