8 (វ៉ាស៉ីនតោន)៖ គណៈកម្មាធិការមួយនៃព្រឹទ្ធសភាអាមេរិក នៅថ្ងៃពុធសប្តាហ៍នេះបានអនុម័តច្បាប់មួយ ដែលនឹងជួយបង្កើនការគាំទ្រផ្នែកយោធារបស់សហរដ្ឋអាមេរិក សម្រាប់កោះតៃវ៉ាន់ ក្នុងនោះរួមមានទាំងការផ្តល់ជំនួយយោធារាប់ពាន់លានដុល្លារបន្ថែមទៀត។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១៥ ខែកញ្ញា ឆ្នាំ២០២២។
គណៈកម្មាធិការទំនាក់ទំនងការបរទេសនៃព្រឹទ្ធសភាអាមេរិក បានគាំទ្រច្បាប់គោលនយោបាយតៃវ៉ាន់ (Taiwan Policy Act) ឆ្នាំ២០២២ ក្នុងសំឡេងគាំទ្រ ១៧ ទល់នឹង ៥សំឡេងជំទាស់ ទោះបីជាមានការព្រួយបារម្ភថាច្បាប់ថ្មីនេះអាចបង្កឲ្យមានការខឹងសម្បារពីសំណាក់ទីក្រុងប៉េកាំងក៏ដោយ។ បទប្បញត្តិក្នុងច្បាប់នេះ នឹងអនុញ្ញាតឲ្យមានការរៀបចំរចនាសម្ព័ន្ធយ៉ាងទូលំទូលាយឡើងវិញ ចំពោះគោលនយោបាយរបស់សហរដ្ឋអាមេរិកចំពោះកោះតៃវ៉ាន់ ក៏ដូចជានឹងបើកផ្លូវផ្ដល់ជំនួយ យោធា ៤.៥ពាន់លានដុល្លារសម្រាប់តៃវ៉ាន់ ក្នុងរយៈពេល ៤ឆ្នាំ និងគាំទ្រដល់ការចូលរួមរបស់តៃវ៉ាន់ក្នុងអង្គការអន្តរជាតិនានា។
គួរបញ្ជាក់ថា នៅពេលដែលសេចក្តីព្រាងច្បាប់នេះត្រូវបានណែនាំជាលើកដំបូង កាលពីខែមិថុនា ប្រទេសចិនបានឆ្លើយតបដោយលើកឡើងថាខ្លួននឹងចាត់វិធានការ ឆ្លើយតបយ៉ាងម៉ឺងម៉ាត់ ប្រសិនបើទីក្រុងវ៉ាស៉ីនតោនដាក់ចេញនូវផែនការដែលប៉ះពាល់ដល់ផលប្រយោជន៍របស់ចិន៕
