9 
(ភ្នំពេញ)៖ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី៩ ខែកក្កដា ឆ្នាំ២០២២ បានផ្ញើសាររំលែកទុក្ខ ចំពោះមរណភាពលោក ស៉ីនហ្សូ អាបេ (Shinzo Abe) អតីតនាយករដ្ឋមន្ត្រីជប៉ុន។
តាមរយៈ Facebook ផ្លូវការ លោក ប្រាក់ សុខុន បានថ្លែងសារយ៉ាងដូច្នេះថា «ខ្ញុំសូមចូលរួមជាមួយសហការីរបស់ខ្ញុំជុំវិញពិភពលោក ក្នុងការកាន់មរណទុក្ខរបស់ ឯកឧត្តម ស៉ីនហ្សូ អាបេ ដែលជាមិត្តដ៏ល្អរបស់កម្ពុជា។ ខ្ញុំសូមចូលរួមរំលែកទុក្ខយ៉ាងក្រៀមក្រំបំផុត ទៅកាន់ក្រុមគ្រួសារ និងមិត្តភក្តិរបស់ ឯកឧត្តម ក៏ដូចជាប្រជាជនជប៉ុន ចំពោះភាពសោកសង្រេង និងការបាត់បង់ដ៏ធំធេងមួយនេះ។ សមិទ្ធិផលរបស់ឯកឧត្តមទាំងប៉ុន្មាន នឹងត្រូវបានមនុស្សរាល់គ្នាចងចាំ និងវាយតម្លៃខ្ពស់ពីមួយជំនាន់ទៅមួយជំនាន់»។
សូមបញ្ជាក់ថា លោក អាបេ បានស្លាប់បាត់បង់ជីវិតនៅមន្ទីរពេទ្យ ក្រោយត្រូវបានបាញ់ប្រហារក្នុងអំឡុងពេលធ្វើយុទ្ធនាការឃោសនាបោះឆ្នោតថ្នាក់ជាតិ នៅភាគខាងលិចទីក្រុងណារ៉ា ប្រទេសជប៉ុន នៅព្រឹកថ្ងៃសុក្រ ទី០៨ ខែកក្កដា ឆ្នាំ២០២២៕
