ក្រសួងព័ត៌មាន ផ្តល់ពានរង្វាន់លើកទឹកចិត្តជូនអ្នកព័ត៌មាន១៤រូប ធ្វើសកម្មភាពសកម្មលើវិស័យព័ត៌មាន ក្នុងទសវត្សរ៍ឆ្នាំ១៩៧០ ដល់ ឆ្នាំ២០១០

(ភ្នំពេញ)៖ ក្រសួងព័ត៌មាននៅព្រឹកថ្ងៃព្រហស្បតិ៍ ទី២៤ ខែមីនា ឆ្នាំ២០២២នេះ បានរៀបចំពិធីប្រគល់ពានរង្វាន់លើកទឹកចិត្តជូនអ្នកព័ត៌មាន១៤រូប ដែលត្រូវបានវាយតម្លៃជាអ្នកព័ត៌មានបានធ្វើសកម្មភាពយ៉ាងសកម្មលើវិស័យព័ត៌មាន។ អ្នកសារព័ត៌មានទាំង១៤រូបនេះ ជាអ្នកដែលបម្រើការងារលើវិស័យព័ត៌មាន៥សម័យកាលផ្សេងគ្នា គឺសម័យឆ្នាំ១៩៧០ ១៩៨០ ១៩៩០ ២០០០ និង២០១០។

អ្នកសារព័ត៌មានចំនួន១៤រូប ដែលត្រូវបានជ្រើសរើសផ្តល់ពានរង្វាន់លើកទឹកចិត្តនេះរួមមាន សម្រាប់ទសវត្សរ៍ឆ្នាំ១៩៧០ មានលោក ជេត សន និពន្ធ នាយកកាសែតភ្នំពេញថ្មី និងជាប្រធានរដ្ឋបាលក្លិបអ្នកកាសែតកម្ពុជា និងលោក ព្រហ្ម សាយ និពន្ធនាយកអរិយធម៌ខ្មែរ។

សម្រាប់ទសវត្សរ៍ឆ្នាំ១៩៨០ មានលោក ទាវ សារៈមុន្នី និពន្ធនាយកកាសែតរស្មីកម្ពុជា លោក ពេជ ប៊ុនរ៉ា និពន្ធនាយកទូរទស្សន៍ ហង្ស មាស និង លោកស្រី ជា ស៊ុនដាណែត អគ្គនាយិកាវិទ្យុ FM102 ។

សម្រាប់ ទសវត្សរ៍ ឆ្នាំ១៩៩០ មាន លោក សយ សុភាព អគ្គនាយកសារព័ត៌មានដើមអំពិល លោក មឿន ឈានណារិទ្ធ បណ្ណាធិការរង និង ជាអ្នកសរសេរអត្ថបទបែបពណ៌នា នៅកាសែត ខ្មែរ-ថាមស៍ និងជាសាស្ត្រាចារ្យសារព័ត៌មាន នៃវិទ្យាស្ថានសារព័ត៌មាន និង លោក ជុន សុផល អ្នកយកព័ត៌មាន នៃទស្សនាវដ្តីអង្គរធំ។

សម្រាប់ ទសវត្សរ៍ ឆ្នាំ២០០០ មាន លោក ម៉ៃ ទិត្យថារ៉ា មន្ត្រីជំនាញផ្នែកសារព័ត៌មាននៃ Internews ប្រចាំកម្ពុជា និងលោក លី ម៉េងហួរ អ្នកសារព័ត៌មាននៃទូរទស្សន៍ PNN ។

សម្រាប់ទសវត្សរ៍ ឆ្នាំ២០១០ មាន លោក ផាក់ ស៊ាងលី អ្នកសារព័ត៌មានផ្នែកបរិស្ថាន និងសង្គម នៅកាសែតភ្នំពេញប៉ុស្តិ៍ លោក វ៉ាន់ សារាយ អគ្គនាយករង ផ្នែកផ្សព្វផ្សាយព័ត៌មាន នៅអង្គភាព Fresh News លោក មិន ម៉ៅ – សំណាង អ្នកសារព័ត៌មានទូរទស្សន៍ PNN និង ជាតំណាងបណ្តាញអ្នកសារព័ត៌មានផ្នែកទឹក និងអនាម័យកម្ពុជា និង អ្នកស្រី ញឹក ស្រីល័ក្ខ និពន្ធនាយិកាសារព័ត៌មានថ្មីៗ២៥ រាជធានី-ខេត្ត ។

ពានរង្វាន់លើកទឹកចិត្តអ្នកសារព័ត៌មាន គឺជាពានរង្វាន់មួយរៀបចំបង្កើតឡើងដោយក្រសួងព័ត៌មាន រួមសហការដោយសារព័ត៌មានត្នោត និងសារព័ត៌មានថ្មីៗ។

លោក ព្រំ សិលា តំណាងអង្គភាពសារព័ត៌មានត្នោត និងជាក្រុមការងារនៃពានរង្វាន់លើកទឹកចិត្តអ្នកសារព័ត៌មាន បានឱ្យដឹងថា អ្នកព័ត៌មានដែលត្រូវបានជ្រើសរើស គឺឆ្លងការពិភាក្សាពិនិត្យ និងវាយតម្លៃយ៉ាងល្អិតល្អន់របស់គណ:កម្មការ៥រូប មកពីក្រសួងព័ត៌មាន ព័ត៌មាន Fresh News សារព័ត៌មានថ្មីៗ និងសារព័ត៌មានត្នោត។

លោក សិ លា បានឱ្យដឹងទៀតថា អ្នកសារព័ត៌មាន ដែលត្រូវបានជ្រើសរើស គឺជាអ្នកសារព័ត៌មានដែលបានបង្កើតស្នាដៃ លើកកម្ពស់ និងកែលំអរវិស័យព័ត៌មាន។ លោកបានបន្ថែមថា ពានរង្វាន់ដែលផ្តល់ជូននេះ មិនផ្តោតត្រឹមតម្លៃពានប៉ុណ្ណោះទេ តែបានផ្តោតជាសំខាន់លើស្នាដៃរបស់ពួកគេ ដែលបានចូលរួមចំណែកលើកកម្ពស់លើវិស័យព័ត៌មាន។

ឯកឧត្តម ផុស សុវណ្ណ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកព័ត៌មាន និងសោតទស្សន៍ បានគូសបញ្ជាក់ថា ពានរង្វាន់លើកទឹកចិត្តអ្នកសារព័ត៌មាន គឺជាពានរង្វាន់រំលឹកដល់ការលះបង់កម្លាំងកាយ និងបញ្ញាស្មារតី របស់អ្នកសារព័ត៌មានទាំង១៤រូប ដែលបានចូលរួមលើកកម្ពស់វិស័យព័ត៌មាននៅកម្ពុជា។

ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលបានអញ្ជើញជាអធិបតីក្នុងពិធីប្រគល់ពានរង្វាន់នេះ បានស្វាគមន៍ចំពោះការបង្កើនពានរង្វាន់លើកទឹកចិត្តអ្នកសារព័ត៌មានលើកដំបូងនៅកម្ពុជា។ លោករដ្ឋមន្ត្រី ចាត់កម្មវិធីនេះ ជាការកម្មវិធីដ៏ល្អក្នុងការចងភ្ជាប់អ្នកសារព័ត៌មានពីជំនាន់មួយទៅជំនាន់មួយ ។

លោករដ្ឋមន្ត្រីបានលើកទឹកចិត្តឱ្យរៀបចំកម្មវិធីនេះជាបន្តបន្ទាប់ទៀត ដើម្បីជាការរួមចំណែកដល់ការលើកកម្ពស់វិជ្ជាជីវ:អ្នកសារព័ត៌មាន។

ក្នុងកម្មវិធីនេះលោករដ្ឋមន្ត្រី ក្រសួងព័ត៌មាន និងអតីតអ្នកសារព័ត៌មានដ៏ចំណានមួយរូបដែរនោះ បានផ្តល់នូវដំបូន្មានមួយចំនួន ដើម្បីឱ្យការប្រកបវិជ្ជាជីវ:ព័ត៌មាននៅកម្ពុជាកាន់តែល្អប្រសើរថែមទៀត។ លោករដ្ឋមន្ត្រី បានលើកឡើងថា វិជ្ជាជីវ:សារព័ត៌មានក្នុងសង្គមប្រជាធិបតេយ្យ ជាអ្នកចូលរួមចំណែកដ៏សំខាន់ដល់ការសម្រេចចិត្តនានារបស់ថ្នាក់ដឹកនាំជាតិ និងប្រជាពលរដ្ឋ។

លោករដ្ឋមន្ត្រីបានគូសបញ្ជាក់ដែរថា អ្នកសារព័ត៌មានប្រៀបដូចជាខ្យល់នៅក្នុងបាល់។ ខ្យល់ល្អធ្វើឱ្យការទាត់បាល់បានត្រង់បានចំគោលដៅ។ ក្នុងន័យនេះ លោករដ្ឋមន្ត្រីចង់ឱ្យអ្នកព័ត៌មានពង្រឹងំណេះដឹង ដើម្បីធ្វើឱ្យការបំពេញវិជ្ជាជីវ:ជាអ្នកសារព័ត៌មានបានកាន់តែប្រសើរ។

ឯកឧត្តម ខៀវ កាញារីទ្ធ ក៏បានរំលឹកអ្នកព័ត៌មានដែរពីគុណតម្លៃក្រមសីលធម៌វិជ្ជាជីវ:។ លោករដ្ឋមន្ត្រីបានលើកឡើងថា ក្រមសីលធម៌ជាអាវក្រោះសម្រាប់ការការពារកិត្តិយសរបស់អ្នកសារព័ត៌មាន។

លោក ព្រហ្ម សាយ តំណាងឱ្យអ្នកសារព័ត៌មានទទួលបានពានរង្វាន់ បានសម្តែងការរីករាយជាខ្លាំងសម្រាប់ការរៀបចំឱ្យមានកម្មវិធីនេះឡើង។ លោកចាត់ទុកកម្មវិធីនេះ ជាការរួមចំណែកលើកទឹកចិត្តមួយសម្រាប់អ្នកសារព័ត៌មាន៕