13 
(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅព្រឹកថ្ងៃទី០១ ខែវិច្ឆិកា ឆ្នាំ២០២១នេះ បានបញ្ជាក់អំពីការដាក់បញ្ជាឲ្យទិញថ្នាំរួចហើយ ឲ្យទិញថ្នាំព្យាបាលអ្នកកើតជំងឺកូវីដ១៩ របស់សហរដ្ឋអាមេរិក ត្រៀមសម្រាប់មនុស្ស៥ម៉ឺននាក់ ដែលក្នុងតម្លៃមនុស្សម្នាក់៥០ដុល្លារ (បូកទាំងថ្លៃដឹកជញ្ជូន)។
សម្ដេចតេជោ ហ៊ុន សែន បានអះអាងទៀតថា កម្ពុជាមិនបានរើសអើងឱសថក្នុងការព្យាបាលអ្នកកើតជំងឺកូវីដ១៩នោះទេ ពោលឲ្យតែឱសថនោះមានប្រសិទ្ធភាព ក្នុងការប្រើប្រាស់ដើម្បីព្យាបាលជំងឺ ពិសេសអ្នកជំងឺកូវីដ១៩ គឺត្រូវទិញយកមកប្រើប្រាស់ទាំងអស់។
ការមានប្រសាសន៍របស់សម្ដេចតេជោ ហ៊ុន សែន បានធ្វើឡើងក្នុងឱកាស អញ្ជើញបិទយុទ្ធនាការចាក់វ៉ាក់សាំងបង្ការជំងឺកូវីដ១៩ សម្រាប់អ្នកមានអាយុ៦ឆ្នាំឡើង និងបើកយុទ្ធនាការចាក់សម្រាប់ក្មេងអាយុ៥ឆ្នាំ។ ពិធីនេះ ត្រូវបានធ្វើឡើងនៅវិមានសន្ដិភាព។
សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «ក្រៅពីឱសថដែលយើងកំពុងព្យាបាលយើងកំពុងទិញថ្នាំសម្រាប់ការព្យាបាល ចំនួន៥ម៉ឺននាក់ គឺថ្នាំអាមេរិកដែលគេថាព្យាបាលល្អ ក្នុងតម្លៃម្នាក់៥០ដុល្លារ។ ការពិតអ្នកឈឺកូវីដដែលកំពុងព្យាបាល តែប៉ុន្មានពាន់នាក់ប៉ុណ្ណោះ ប៉ុន្ដែត្រូវទិញទុកសម្រាប់ព្យាបាលមនុស្ស៥ម៉ឺននាក់»។
សម្ដេចតេជោ នាយករដ្ឋមន្ដ្រី បានគូសបញ្ជាក់ថា កាលពីពេលកន្លងទៅ កម្ពុជាប្រើប្រាស់ថ្នាំរបស់ចិន ដើម្បីព្យាបាលអ្នកកើតជំងឺកូវីដ១៩ ប៉ុន្ដែបច្ចុប្បន្ននេះមានថ្នាំរបស់អាមេរិកដែលគេអះអាងថា ល្អ និងមានប្រសិទ្ធភាព ត្រូវទិញមកត្រៀមបន្ថែមទៀត។ សម្ដេចថា កម្ពុជាមិនបានរើសអើងក្នុងការប្រើប្រាស់ថ្នាំសម្រាប់ព្យាបាលនោះទេ ពោលឲ្យតែមានប្រសិទ្ធត្រូវទិញមកប្រើប្រាស់ទាំងអស់។
បើទោះបីមានថ្នាំសម្រាប់ព្យាបាលក៏ពិតមែន ប៉ុន្ដែសម្ដេចតេជោ ហ៊ុន សែន នៅតែបន្ដក្រើនរំលឹកដល់ប្រជាពលរដ្ឋមិនត្រូវពឹងផ្អែកទាំងស្រុង លើឱសថព្យាបាល រហូតភ្លេចពីវិធីការពារខ្លួននោះឡើយ។
សម្ដេចតេជោ ហ៊ុន សែន បានសង្កត់ធ្ងន់បន្ថែមទៀតថា មូលដ្ឋានដើម្បីការពារសុខភាពប្រជាពលរដ្ឋពីជំងឺកូវីដ១៩ មានគ្រប់គ្រាន់ទាំងវ៉ាក់សាំង ឱសថសម្រាប់អ្នកឈឺជាដើម។ ទាំងអស់នេះហើយទើបរាជរដ្ឋាភិបាលកម្ពុជា ហា៊នសម្រេចចិត្តក្នុងការបើកដំណើរការប្រទេសឡើងវិញ ចាប់ពីថ្ងៃទី០១ ខែវិច្ឆិកា ឆ្នាំ២០២១នេះតទៅ៕
