48 បាល់ទាត់៖ ស្របពេលជាមួយ Euro ២០២០ ដែរព្រឹត្តិការណ៍បាល់ទាត់ជើងឯកអាមេរិកឡាទីន Copa America នឹងឈានដល់វគ្គផ្តាច់ព្រ័ត្រនៅព្រឹកថ្ងៃចន្ទខាងមុខនេះហើយ ដែលនឹងជាជំនួបរវាងក្រុមយក្សទាំងពីរនៅអាមេរិកខាងត្បូង ប្រេស៊ីលជួបអាហ្សង់ទីន។
អំឡុងប្រជុំជាមួយមេដឹកនាំអាមេរិកខាងត្បូង កាលពីថ្ងៃព្រហស្បតិ៍ម្សិលមិញតាមរយៈប្រព័ន្ធអនឡាយ ប្រធានាធិបតីប្រេស៊ីល លោក Jair Bolsonaro បាននិយាយបែបលេងសើចទៅកាន់ប្រធានាធិបតីអាហ្សង់ទីន លោក Alberto Fernandez ថា ប្រទេសរបស់លោកនឹងយកឈ្នះអាហ្សង់ទីនដល់ទៅ ៥-០។ ការប្រកួតរវាងប្រេស៊ីល និងអាហ្សង់ទីនវគ្គផ្តាច់ព្រ័ត្រ Copa America នឹងធ្វើឡើងនៅកីឡដ្ឋាន Estadio do Maracana ទីក្រុង Rio de Janiero ប្រទេសប្រេស៊ីល។
ជំនួបវគ្គផ្តាច់ព្រ័ត្រនេះនឹងជាឱកាសរបស់ខ្សែប្រយុទ្ធ ដែលផុតកុងត្រាជាមួយ Barcelona, Lionel Messi ក្នុងការស្វែងរកពានលើកដំបូងឱ្យក្រុមជំរើសជាតិអាហ្សង់ទីន និងបញ្ចប់ការទន្ទឹងរង់ចាំរបស់អាហ្សង់ទីន ដែលខកខានឈ្នះជើងឯកសំខាន់ៗណាមួយ ២៨ឆ្នាំ។ អាហ្សង់ទីនជាក្រុមដែលឈ្នះជើងឯក Copa America ច្រើនជាងគេ ១៤ដង បន្ទាប់ពីអ៊ុយរូហ្កាយដែលឈ្នះ ១៥ដង។ តែអាហ្សង់ទីនបានខកខានឈ្នះជើងឯក Copa America នេះតាំងពីឆ្នាំ១៩៩៣។ ចំណែកប្រេស៊ីលធ្លាប់ឈ្នះជើងឯក ៩លើក និងឈ្នះចុងក្រោយបំផុតនៅឆ្នាំ២០១៩៕
