31 
ភ្នំពេញ ៖ តាមរយៈហ្វេសប៊ុកផ្លូវការរបស់សម្តេចតេជោ នាយករដ្ឋមន្ត្រីនៅយប់មិញនេះសម្តេចបានប្រកាសអំពីសត្វតោ១ក្បាលដែលបានដកហូតពីជនជាតិចិនម្នាក់នៅភ្នំពេញ កន្លងមកនេះ ត្រូវបានសម្តេចណែនាំប្រគល់ឲ្យម្ចាស់យកទៅចិញ្ចឹមថែទាំវិញ។
សម្តេចបានសរសេរថា កាលពីល្ងាចថ្ងៃម្សិលមិញនេះសម្តេច បានពិភាក្សាជាមួយរដ្ឋមន្ត្រីក្រសួងកសិកម្ម និងបានឯកភាពគ្នាថា អនុញ្ញាតឱ្យម្ចាស់យកទៅចិញ្ចឹមវិញក្នុងលក្ខខណ្ឌម្ចាស់ត្រូវធ្វើទ្រុង ឱ្យបានត្រឹមត្រូវដើម្បីធានា សុវត្ថិភាពទាំងមនុស្សក្នុងផ្ទះ និងអ្នករស់នៅជិតខាង។ អរគុណបងប្អូនជនរួមជាតិទាំងក្នុង និងក្រៅប្រទេស ដែលបានផ្តល់យោបល់និងអាណិតដល់សត្វតោ។
សូមជម្រាបជូនផងដែរថា កាលព្រឹកថ្ងៃទី២៧ ខែមិថុនា ឆ្នាំ២០២១ អាជ្ញាធរចម្រុះ បានចុះធ្វើការដកហូតយកសត្វតោឈ្មោលមួយក្បាល ពីជនជាតិចិន ដែលបានចិញ្ចឹមដោយខុសច្បាប់ នៅក្នុងលំនៅឋានរបស់ខ្លួន ស្ថិតនៅផ្ទះលេខ២២ ផ្លូវ៣០៦ ភូមិ៧ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។
សត្វតោឈ្មោលមួយក្បាលនេះ មានទម្ងន់ ៧០គីឡូក្រាម ត្រូវបានបុរសជនជាតិចិនចិញ្ចឹមតាំងពីតូច រហូតដល់ពេលនេះ មានអាយុប្រមាណ១ឆ្នាំកន្លះ ដោយឱ្យវាស៊ីសាច់៦គីឡូក្រាមក្នុង១ថ្ងៃ។
ប្រតិបត្តិការចុះដកហូតសត្វតោដែលជាប្រភេទសត្វព្រៃកម្រនេះ ដឹកនាំដោយ លោក គាំ សីហា នាយខណ្ឌរដ្ឋបាលព្រៃឈើភ្នំពេញ សហការជាមួយព្រះរាជអាជ្ញារងអមសាលាដំបូង រាជធានីភ្នំពេញ និងមានការចូលរួមពីអង្គការសម្ព័ន្ធមិត្តសត្វព្រៃ Wildlife Alliance ព្រមទាំងសមត្ថកិច្ចចម្រុះមូលដ្ឋាន ដកហូតពីជនជាតិចិនដែលបានចិញ្ចឹមសត្វតោឈ្មោលមួយក្បាលជាប្រភេទសត្វព្រៃនៅក្នុងផ្ទះដោយខុសច្បាប់។
សមត្ថកិច្ចរដ្ឋបាលព្រៃឈើភ្នំពេញ បានឱ្យដឹងថា ដោយសារមានប្រជាពលរដ្ឋជិតខាងបានរាយការណ៍ប្រាប់អំពីការចិញ្ចឹមសត្វតោ នៅក្នុងផ្ទះវីឡាខាងលើពីសំណាក់បុរសជនជាតិចិន ទើបអាជ្ញាធរសហការជាមួយអាជ្ញាធរមូលដ្ឋានចុះធ្វើការស្រាវជ្រាវឈានដល់ការចុះដកហូតយកសត្វតោឈ្មោលមួយក្បាលនោះ ដើម្បីបញ្ជូនទៅថែរក្សាទុក។
ទោះជាយ៉ាងណាសត្វតោមួយក្បាលនេះ ត្រូវសម្តេចអនុញ្ញាតឲ្យម្ចាស់យកទៅចិញ្ចឹមវិញហើយ ប៉ុន្តែត្រូវធ្វើទ្រុងឲ្យបានត្រឹមត្រូវដើម្បីធានា សុវត្ថិភាពទាំងអ្នកនៅក្នុងផ្ទះ និងអ្នកជិតខាង៕
