40 ស្វីស៖ កាលពីថ្ងៃច័ន្ទ សហរដ្ឋអាមេរិកអំពាវនាវដល់ប្រទេសចិន អនុញ្ញាតឱ្យក្រុមជំនាញមកពីអង្គការសុខភាពពិភពលោកសម្ភាស “អ្នកមើលថែអ្នកជំងឺ អតីតអ្នកជំងឺ និងបុគ្គលិកនៅមន្ទីរពិសោធន៍” នៅទីក្រុងអ៊ូហានភាគកណ្ដាលរបស់ចិន ដោយបង្កឲ្យមានការស្តីបន្ទោសពីទីក្រុងប៉េកាំង។
ក្រុមអ្នកជំនាញឯករាជ្យដឹកនាំដោយអង្គការសុខភាពពិភពលោក ដែលព្យាយាមកំណត់ប្រភពដើមនៃជំងឺCOVID-19 បានទៅដល់ទីក្រុងអ៊ូហានកាលពីថ្ងៃទី១៤ ខែមករា ជាទីដែលពួកគេកំពុងរៀបចំកិច្ចពិភាក្សាតាមទូរស័ព្ទជាមួយសមភាគីចិន ក្នុងអំឡុងពេលនៃការដាក់ឲ្យនៅដាច់ដោយឡែករយៈពេល ២សប្ដាហ៍មុនពេលចាប់ផ្ដើមបេសកកម្មរបស់ខ្លួន។ សហរដ្ឋអាមេរិកដែលបានចោទប្រកាន់ប្រទេសចិនថា បានលាក់បាំងវិសាលភាពនៃការផ្ទុះវីរុសដំបូងរបស់ខ្លួន បានអំពាវនាវឱ្យមានការស៊ើបអង្កេតដែលដឹកនាំ ដោយអង្គការសុខភាពពិភពលោកប្រកបដោយតម្លាភាព និងបានរិះគន់លក្ខខណ្ឌនៃដំណើរទស្សនកិច្ចនេះ ដោយក្នុងនោះក្រុមអ្នកជំនាញចិនបានធ្វើការស្រាវជ្រាវ ដំណាក់កាលដំបូងរួចទៅហើយ។
លោក Garrett Grigsby មកពីក្រសួងសុខាភិបាល និងប្រជាសេវា ដែលដឹកនាំគណៈប្រតិភូសហរដ្ឋអាមេរិកបាននិយាយថា ប្រទេសចិនគួរតែចែករំលែករាល់ការសិក្សាវិទ្យាសាស្ត្រ លើសំណាកសត្វ មនុស្ស និងបរិស្ថានដែលយកចេញពីទីផ្សារមួយនៅទីក្រុងអ៊ូហាន ជាទីដែលវីរុស SARS-CoV-2 ត្រូវបានគេជឿថា បានផ្ទុះឡើងកាលពីចុងឆ្នាំ២០១៩ កន្លងទៅ៕
