42 ឥណ្ឌូនេស៊ី៖ ក្រុមមន្ត្រីបាននិយាយកាលពីថ្ងៃអាទិត្យថា មនុស្សរាប់ម៉ឺននាក់ត្រូវបានជម្លៀសចេញពីលំនៅឋាន ហើយមនុស្សរាប់សិបនាក់បានស្លាប់នៅក្នុងប៉ុន្មានថ្ងៃថ្មីៗនេះ ដោយសារទឹកជំនន់នៅលើកោះបនីអូ (Borneo)របស់ប្រទេសឥណ្ឌូនេស៊ី។
អ្នកនាំពាក្យទីភ្នាក់ងារកាត់បន្ថយគ្រោះមហន្តរាយជាតិ លោក Raditya Jati បាននិយាយថា ទឹកជំនន់ដែលបណ្ដាលមកពីភ្លៀងធ្លាក់ខ្លាំង ធ្វើឲ្យកម្ពស់ទឹកហក់ឡើងដល់ ៣ម៉ែត្រ។ គិតត្រឹមថ្ងៃអាទិត្យម្សិលមិញ មនុស្សចំនួន ៣៩.៥៤៩នាក់ត្រូវបានជម្លៀសចេញ ហើយយ៉ាងហោចណាស់ ១៥នាក់ត្រូវបានបាត់បង់ជីវិតដោយសារទឹកជំនន់ ដែលបានប៉ះពាល់ដល់ស្រុក និងក្រុងចំនួន ១០ នៅខេត្តកាលីម៉ានតានខាងត្បូង នៅកោះបនីអូ។ ដោយឡែកមនុស្ស ៥នាក់បានស្លាប់ និង ៥០០នាក់ផ្សេងទៀតត្រូវបានជម្លៀសចេញ បន្ទាប់ពីទឹកជំនន់ និងបំណាក់ដីនៅទីក្រុងម៉ាណាឌូ ក្នុងខេត្តស៊ូឡាវ៉េស៊ីខាងជើងកាលពីថ្ងៃសៅរ៍។ មនុស្សម្នាក់ទៀតបានបាត់ខ្លួន។
ភ្លៀងរដូវវស្សា និងជំនោរទឹកឡើងខ្ពស់នៅក្នុងប៉ុន្មានថ្ងៃថ្មីៗនេះ បានបង្កឲ្យមានបំណាក់ដី និងទឹកជំនន់រាប់សិបកន្លែងនៅទូទាំងប្រទេសឥណ្ឌូនេស៊ី ដែលជាបណ្ដាញកោះចំនួន ១៧.០០០ ជាទីដែលមានប្រជាជនរាប់លាននាក់រស់នៅតំបន់ភ្នំ ឬនៅក្បែរតំបន់ទំនាបទឹកជំនន់ដ៏មានជីជាតិនៅជិតទន្លេ។ ក្រៅពីទឹកជំនន់ភ្នំភ្លើងសេមេរ៉ូរបស់ប្រទេសឥណ្ឌូនេស៊ី បានព្រួសកម្ទេចផេះក្ដៅចម្ងាយ ៤,៥គីឡូម៉ែត្រកាលពីសៅរ៍។ ភ្នំដែលមានកម្ពស់ ៣,៦៧៦ម៉ែត្រគឺជាភ្នំភ្លើងខ្ពស់បំផុតនៅលើកោះជ្វា ដែលមានប្រជាជនច្រើនបំផុតរបស់ប្រទេសឥណ្ឌូនេស៊ី៕
