10 
ស៊ីហ្គេម៖ ប្រជាពលរដ្ឋជាច្រើនបានឈរអមដងផ្លូវ ដើម្បីអបអរសាទរពិធីដង្ហែទង់សហព័ន្ធកីឡាអាស៊ីអាគ្នេយ៍ដែលហៅកាត់ថា “ទង់ស៊ីហ្គេម” អមជាមួយជ័យលាភីមេដាយមាស ប្រាក់ និងសំរឹទ្ធជាច្រើនគ្រឿង បន្ទាប់ពីបញ្ចប់បេសកកម្មប្រកួតកីឡាស៊ីហ្គេមលើកទី៣១ នៅទីក្រងហាណូយ និងត្រឡប់មកដល់មាតុភូមិវិញកាលពីល្ងាចថ្ងៃទី២៤ ខែឧសភា ឆ្នាំ២០២២ ក្រោមការដឹកនាំរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតស៊ីហ្គេមលើកទី៣២ ឆ្នាំ២០២៣ (CAMSOC)។
ជាមួយនឹងការឈរអបអរក្បួនដង្ហែទង់ស៊ីហ្គេម និងម្ចាស់ជ័យលាភីមេដាយស៊ីហ្គេមនោះ ប្រជាពលរដ្ឋបានសម្ដែងនូវសេចក្ដីរីករាយ និងអបអរសាទរចំពោះសមិទ្ធផលដែលកីឡាករ-កីឡាការិនីខិតខំប្រឹងប្រែង ដើម្បីដណ្ដើមមេដាយជូនជាតិពីព្រឹត្តិការណ៍កីឡាប្រចាំតំបន់ ២ឆ្នាំម្ដង ពិសេសដំណើរមកដល់របស់ “ទង់ស៊ីហ្គេម” សម្រាប់ដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា ហើយប្រជាពលរដ្ឋទាំងអស់ក៏បានត្រៀមខ្លួនរួចរាល់ ដើម្បីចូលរួមព្រឹត្តិការណ៍ជាប្រវត្តិសាស្ដ្រនេះដែរ។ ទន្ទឹមជាមួយដំណើរមាតុភូមិនិវត្តន៍ប្រកបដោយសុវត្ថិភាព អមជាមួយសមិទ្ធផលបំបែកឯកត្តកម្មនេះដែរ សម្ដេចពិជ័យសេនា ទៀ បាញ់ បានចាត់ទុកនេះគឺជាការបើកទំព័រប្រវត្តិសាស្ដ្រថ្មីមួយទៀត ដើម្បីបំផុសស្មារតីប្រជាពលរដ្ឋចូលរួមយុទ្ធនាការឆ្ពោះទៅស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ដោយសម្ដេចបានអំពាវនាវឲ្យប្រជាពលរដ្ឋទាំងអស់ ត្រៀមលក្ខណៈសម្បត្តិក្នុងនាមម្ចាស់ផ្ទះព្រឹត្តិការណ៍ជាប្រវត្តិសាស្ដ្រនេះទាំងអស់គ្នា។
សូមបញ្ជាក់ថា មុនឈានដល់ស៊ីហ្គេមឆ្នាំ២០២៣ កាលពីចន្លោះថ្ងៃទី១២ ដល់ថ្ងៃទី២៣ ខែឧសភា វៀតណាមបានដំណើរការរៀបចំការប្រកួតស៊ីហ្គេមលើកទី៣១ ក្នុងនាមវេនខ្លួនធ្វើម្ចាស់ផ្ទះដោយជោគជ័យ ខណៈអត្តពលិកកម្ពុជា ក៏បានសម្រេចនូវលទ្ធផលគួរជាទីមោទនៈផងដែរ ដោយដណ្ដើមបានមេដាយសរុប ៦៣គ្រឿងរួមមានមេដាយមាស ៩, ប្រាក់ ១៣ និងសំរឹទ្ធ ៤១ ពោលគឺបានបំបែកឯកត្តកម្មមេដាយស៊ីហ្គេមលើកមុនៗពិសេសមេដាយមាស ដែលគិតចាប់ពីក្រោយឆ្នាំ១៩៧៣ នេះគឺជាលើកដំបូងហើយ ដែលអត្តពលិកកម្ពុជាដណ្ដើមបានមេដាយមាសរហូតដល់ ៩គ្រឿង។ អ្វីដែលគួរឲ្យកត់សម្គាល់ក្នុងពិធីបិទការប្រកួតស៊ីហ្គេមលើកទី៣១ នៅទីក្រុងហាណូយកាលពីរាត្រីថ្ងៃទី២៣ ខែឧសភា កម្ពុជាក៏បានចូលរួមទទួលទង់ស៊ីហ្គេម ដើម្បីបន្ដវេនធ្វើម្ចាស់ផ្ទះនាឆ្នាំ២០២៣ ដោយមានការចូលរួមផ្ទាល់ពីសម្ដេចពិជ័យសេនា ទៀ បាញ់ ហើយឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ អនុប្រធានអចិន្ដ្រៃយ៍ CAMSOC និងជាប្រធានគណៈកម្មាធិការជាតិអូឡាំពិកកម្ពុជា ក្នុងនាមប្រធានក្រុមប្រឹក្សាកីឡាអាស៊ីអាគ្នេយ៍ ក៏បានអញ្ជើញទទួលទង់ស៊ីហ្គេមផ្ទាល់ពីវៀតណាម ដើម្បីនាំយកមកដង្ហែនៅរាជធានីភ្នំពេញកាលពីល្ងាចមិញ ដោយមានការប្រគល់ជូនសម្ដេចពិជ័យសេនា មុនដំណើរការក្បួនដង្ហែទៀតផង៕
