9 
បាល់ទាត់៖ ក្រុមម្ចាស់ផ្ទះវៀតណាមទីបំផុតអាចការពារមេដាយមាសស៊ីហ្គេមវិញ្ញាសាបាល់ទាត់បានសម្រេច ក្រោយយកឈ្នះថៃនៅវគ្គផ្តាច់ព្រ័ត្រ ១-០។ ក្រុមទាំងពីរឡើងមកកាន់វគ្គផ្តាច់ព្រ័ត្រដោយយកឈ្នះគូប្រកួតនៅម៉ោងបន្ថែម ១៥នាទីពីរលើកដូចគ្នានៅវគ្គពាក់កណ្តាលផ្តាច់ព្រ័ត្រ។
វគ្គផ្តាច់ព្រ័ត្រម្សិលមិញក៏ហៀបនឹងឈានដល់វគ្គបន្ថែមម៉ោងកាត់សេចក្តីដែរ តែនាទីទី៨៣ កីឡដ្ឋាន My Dinh ទីក្រុងហាណូយបានកក្រើកដោយគ្រាប់បាល់ជ័យជំនះរបស់កីឡាករបម្រុងផ្លាស់ប្តូរចូល Nham Manh Dung តែតបញ្ចូលទីពីបាល់កាត់របស់ Phan Tuan Tai។ ចប់ការប្រកួតវៀតណាមយកឈ្នះថៃបានសម្រេចក្នុងការការពារមេដាយមាសស៊ីហ្គេម និងជាជ័យជំនះលើថៃជាលើកដំបូងនៅវគ្គផ្តាច់ព្រ័ត្រស៊ីហ្គេមបាល់ទាត់អាយុក្រោម ២៣ឆ្នាំ។ ចំណែកឯឥណ្ឌូនេស៊ីដណ្តើមបានមេដាយសំរឹទ្ធ ក្រោយយកឈ្នះម៉ាឡេស៊ីដោយបាល់ ១១ម៉ែត្រកាត់សេចក្តី ៤-៣។ មិនត្រឹមតែបាល់ទាត់បុរសទេ បាល់ទាត់នារីក៏វៀតណាមដែរដោយយកឈ្នះថៃនៅវគ្គផ្តាច់ព្រ័ត្រ ១-០ ដូចគ្នា៕
