10 
អ៊ុយក្រែន៖ កងកម្លាំងអ៊ុយក្រែនបាននិយាយថា រុស្ស៊ីបានបន្តវាយលុកលើភូមិតូចៗនៅសមរភូមិក្នុងតំបន់ Donbas ជាអ្វីដែលប្រជាជនអ៊ុយក្រែនអះអាងថា ជាគោលដៅមិនរើសអើងលើតំបន់ជនស៊ីវិល។
វីដេអូឃ្លីបពីភូមិ Oleksandrivka បង្ហាញកសិដ្ឋានមួយកន្លែងត្រូវបានបាញ់ផ្លោង ដែលត្រូវបានចោទប្រកាន់លើកងកម្លាំងរុស្ស៊ី។ តំបន់នេះត្រូវបានមើលឃើញការប្រយុទ្ធគ្នាខ្លាំង ចាប់តាំងពីការវាយលុកក្នុងខែកុម្ភៈដោយសង្គ្រាមបានឈានចូលដល់ខែទី៣ មកដល់ពេលនេះ។ ថ្លែងទៅកាន់ទូរទស្សន៍ Sky News នៅខាងក្រៅភូមិ Oleksandrivka កងកម្លាំងអ៊ុយក្រែននិយាយថា ពួកគេបានរៀបចំជម្លៀសប្រជាជនគ្រប់គ្នាចេញពីតំបន់ ក្នុងរយៈពេលប៉ុន្មានថ្ងៃចុងក្រោយនេះរួមទាំងអ្នកដែលមិនចង់ចាកចេញ។ គ្រូពេទ្យអ៊ុយក្រែនម្នាក់បានប្រាប់ទូរទស្សន៍ Sky News របស់អង់គ្លេសថា វាមិនមែនជាសង្គ្រាមរបស់ពួកគេទេ ខណៈមានកុមារៗនៅទីនេះ ហើយពួកគេចាំបាច់ត្រូវជម្លៀសចេញ។
ទូរទស្សន៍ Sky News រាយការណ៍ថា អ៊ុយក្រែននៅតែបន្តប្រយុទ្ធដោយបានពង្រឹងកងទ័ពរបស់ខ្លួន នៅភាគខាងកើតប្រទេសជាមួយនឹងទាហានថ្មី និងសព្វាវុធថ្មីៗ។ គ្រូពេទ្យបាននិយាយថា យើងនៅលើទឹកដីរបស់យើង គ្មានផ្លូវត្រឡប់ក្រោយសម្រាប់ពួកយើង ប៉ុន្តែទាហានរុស្ស៊ីភាគច្រើនមិនយល់ពីអ្វីដែលពួកគេកំពុងធ្វើនៅទីនេះ ហើយប្រសិនបើពួកគេមានខួរក្បាលគិត ពួកគេនឹងយល់ថា ពួកគេជាឃាតក និងជាអ្នកឈ្លានពាន៕
