8 
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃព្រហស្បតិ៍ ទី២៨ ខែមេសា ឆ្នាំ២០២២នេះ បានអញ្ជើញជួបសំណេះសំណាល និងផ្តល់អនុសាសន៍ ដល់កីឡាករ កីឡាការិនី និងអត្តពលិក មុនពេលពួកគេចេញទៅប្រកួតកីឡាស៊ីហ្គេម (SEA Game) លើកទី៣១ នៅប្រទេសវៀតណាម។
ខាងក្រោមនេះជាប្រសាសន៍សំខាន់ៗរបស់សម្ដេចតេជោ ហ៊ុន សែន នាយករដ្ឋមន្ត្រី៖
– សម្តេចតេជោ ហ៊ុន សែន បញ្ជាក់ថា រយៈពេលប៉ុន្មានឆ្នាំកន្លងមកនេះ កម្ពុជាបានញាំញីដោយការរាតត្បាត នៃជំងឺកូវីដ-១៩។ ទោះបែបនេះក្តី កម្ពុជាបានប្រឹងប្រែងជំនះយ៉ាងខ្លាំង រហូតដល់មានលទ្ធផលល្អដូចពេលនេះ។
– សម្តេចតេជោ ហ៊ុន សែន ប្រកាសថា ការបញ្ជូនកីឡាករ-កីឡាការិនី ទៅក្រៅប្រទេស ដើម្បីចូលរួមប្រកួតកីឡាស៊ីហ្គេមនៅប្រទេសវៀតណាមនាពេលនេះ គឺជាពេលចុងក្រោយហើយ ខណៈដែលកម្ពុជានឹងធ្វើជាម្ចាស់ផ្ទះប្រកួតកីឡាស៊ីហ្គេម នៅឆ្នាំ២០២៣ខាងមុខនេះ។
– សម្តេចតេជោ ហ៊ុន សែន បញ្ជាក់ថា នៅពេលនេះវៀតណាម នៅបន្តការឆ្លងរីករាលដាលជំងឺកូវីដ-១៩ គ្រាន់តែករណីឆ្លងនោះ មានការធ្លាក់ចុះ និងកម្រិត ដែលអាចគ្រប់គ្រងបាន ហើយសម្តេចក៏មិនដឹងថា «តើការប្រកួតលើវិញ្ញាសារនានានោះ អនុញ្ញាតឱ្យមានមនុស្សចូលរួមទស្សនា ឬយ៉ាងណានោះទេ»។
– សម្តេចតេជោ ហ៊ុន សែន ប្រកាសដល់កីឡាទាំងអស់ឱ្យគោរពវិន័យ និងហាមប្រើប្រាស់សារធាតុបង្កើនកម្លាំង ដែលមានការហាមឃាត់ ដោយសម្តេចចាត់ទុកថា «ទោះទទួលបានមេដាយមាសក៏ដោយ ឱ្យតែស្អុយឈ្មោះដោយប្រើប្រាស់សារធាតុញៀន ឬសារធាតុប៉ូវកម្លាំង ដែលមានការហាមឃាត់ គឺគ្មានន័យទេ»។
– សម្តេចតេជោ ហ៊ុន សែន បញ្ជាក់ថា ពាក្យស្តង់ដាតែមួយ មានតែនៅវិញ្ញាសារកីឡាតែប៉ុណ្ណោះ តែសម្រាប់លទ្ធិប្រជាធិបតេយ្យ គឺគ្មានស្តង់ដាតែមួយទេ ។ ការគ្រប់គ្រងប្រទេសមួយ វាអា្រស័យលើភាពចាំបាច់ និងភាពជាក់ស្តែង នៃបណ្តាប្រទេសនីមួយៗ។ សម្តេចបញ្ជាក់ថា ប្រព័ន្ធបោះឆ្នោតនៅអាមេរិកក្តី និងនៅបារាំងក្តី គឺមិនដូចគ្នាទេ ហើយប្រទេសផ្សេងៗទៀត ក៏មិនដូចគ្នាដែរ។
– សម្ដេចតេជោ ហ៊ុន សែន កោតសរសើរ ចំពោះការរៀបចំប្រតិភូ និងអត្តពលិកកម្ពុជា ៥៦០នាក់ ចូលរួមប្រកួតកីឡាស៊ីហ្គេម លើកទី៣១ នៅប្រទេសវៀតណាម ដែលជាចំនួនសមស្របមួយ បើធៀបទៅនឹងការប្រកួតស៊ីហ្គេម នៅប្រទេសហ្វីលីពីន កាលពីឆ្នាំ២០០៥ ដែលមានអ្នកជូនដំណើរច្រើនជាងកីឡាករ-កីឡាការិនី។
– សម្តេចតេជោ ហ៊ុន សែន ប្រកាសដល់បណ្ឌិតមួយចំនួន ដែលតែងធ្វើអត្ថាធិប្បាយប៉ប៉ាច់ប៉ប៉ោច ដោយមិនយល់ដឹងពីប្រព័ន្ធគ្រប់គ្រង នៃបណ្តាប្រទេសនីមួយៗ ហើយចេះតែលើកឡើងតែពីស្តង់ដាមួយ ឬស្តង់ដារួម នៃលទ្ធិប្រជាធិបតេយ្យ។ សម្តេចបញ្ជាក់ថា «ទោះកាន់លទ្ធិប្រជាធិបតេយ្យដូចគ្នាមែន តែប្រទេសខ្លះប្រធានាធិបតីនិយម ប្រទេសខ្លះសភានិយម ឬនាយករដ្ឋមន្ត្រីនិយមជាដើម»។
– សម្តេចតេជោ ហ៊ុន សែន បានបញ្ជាក់ដោយសំណើចតិចៗថា នៅពេលនេះ ពិភពលោកយើងពោរពេញទៅដោយភាពច្របូកច្របល់ ដោយសារភាពមិនចុះសម្រុងគ្នា ឬមិនយោគយល់គ្នាលើចំណុចរួមនានា ដោយសារកត្តាផលប្រយោជន៍ហួសហេតុ និងនិន្នាការនយោបាយ តំបន់ ឬសកល។
– សម្តេចតេជោ ហ៊ុន សែន ប្រកាសដល់គណៈកម្មការជាតិប្រយុទ្ធប្រឆាំងកូវីដ-១៩ ដែលរួមមាន៖ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល ពិភាក្សាគ្នាយកអ្នកជំងឺកូវីដ-១៩ ដែលកំពុងសម្រាកព្យាបាលនៅស្តាតអូឡាំពិត ផ្ទេរទៅមន្ទីរពេទ្យហ្លួងម៉ែ ឬចាក់អង្រែ ដើម្បីប្រគល់ស្តាតអូឡាំពិកឱ្យផ្នែកកីឡាជាអ្នកគ្រប់គ្រងវិញ ព្រោះស៊ីហ្គេម២០២៣ ដែលកម្ពុជាជាម្ចាស់ផ្ទះ កាន់តែជិតមកដល់ហើយ។
– សម្តេចតេជោ ហ៊ុន សែន ប្រកាសថា មន្ទីរពេទ្យហ្លួងម៉ែ ដែលកំពុងឱ្យអ្នកជំងឺសម្រាកព្យាបាលកូវីដ-១៩នោះ នឹងប្រែក្លាយទៅជាមន្ទីរពេទ្យឯកទេសជំងឺ«មហារីក» នៅពេលក្រោយ បន្ទាប់ពីស្ថានភាពជំងឺកូវីដ-១៩ បានរលាយរលត់ អស់អ្នកជំងឺកូវីដ-១៩ព្យាបាលនៅទីនោះ។
– សម្តេចតេជោ ហ៊ុន សែន បានបញ្ជាកថា កុំតែមានសង្គ្រាមអូសបន្លាយរាប់ឆ្នាំមកនេះ ម្លេះវិស័យកីឡាជាតិកម្ពុជា មិនដឹងរីកច្រើនដល់កម្រិតណាទេ ព្រោះសម្តេចឪ ព្រះបរមរតនកោដ្ឋ អតីតព្រះមហាក្សត្រ នៃយើង ទ្រង់មានព្រះទ័យយកចិត្តទុកដាក់ខ្ពស់ណាស់លើវិស័យកីឡាជាតិ។
– សម្តេចតេជោ ហ៊ុន សែន បានលើកឡើងពីការគន់គូររបស់គ្រូទាយថា «សម្តេចនឹងជន្មាយុ ១០១ឆ្នាំ»។ ត្រង់ចំណុចនេះសម្តេចបានលើកឡើងថា «ពូជសម្តេចគ្មាននរណាអាយុតិចទេ មានតែអាយុ៩០ឡើង»។ ទោះជាបែបនេះ ក្តីសម្តេចបានប្រកាសមិនមានបំណងកាន់អំណាចរហូតដល់អាយុ១០១ឆ្នាំនោះឡើយ ។
– សម្តេចតេជោ ហ៊ុន សែន បានប្រកាសដល់កីឡាករ-កីឡាការិនី ទៅប្រកួតកីឡាស៊ីហ្គេម នៅវៀតណាម មានវិធានការផ្ទាល់ខ្លួន ដើម្បីគេចផុតពីការឆ្លងរីករាលដាលជំងឺកូវីដ-១៩ ដល់កីឡាករ-កីឡាការិនី គ្រូបង្វិក និងក្រុមការងារ ដោយសម្តេចបានផ្តល់អនុសាសន៍ដល់កីឡាករ-កីឡាការិនី គ្រូបង្វិក និងក្រុមការងារ ទាំងនោះប្រើប្រាស់ម៉ាស«N95»។
– សម្តេចតេជោ ហ៊ុន សែន ប្រកាសដល់កីឡាករ-កីឡាការិនី ទៅប្រកួតស៊ីហ្គេមនៅប្រទេសវៀតណាម សូមរក្សាសេចក្តីថ្លៃថ្នូរ និងកិត្តិយសជាតិកម្ពុជា«ចាញ់-ឈ្នះ ជារឿងធម្មតា»។ សម្តេចក៏បានប្រកាសដល់កីឡាករ-កីឡាការិនីទាំងនោះថា «សូមកុំភ្លេចថា ពេលដែលយើងកំពុងប្រកួត មានប្រជាពលរដ្ឋ ១៦-១៧លាននាក់កំពុងគាំទ្រយើងពីក្រោយ»។
– សម្តេចតេជោ ហ៊ុន សែន ប្រកាសសុំការអធ្យាស្រ័យពីមន្ត្រីរាជការស៊ីវិល និងកងកម្លាំងប្រដាប់អាវុធ(ទាហាន, នគរបាល,អាវុធហត្ថ) ដែលរយៈពេល នៃការញាំញីដោយការរាតត្បាតជំងឺកូវីដ-១៩ប៉ុន្មានឆ្នាំនេះ រដ្ឋមិនបានដំឡើងប្រាក់បៀវត្សរ៍ជូន ដោយសារយើងត្រូវយកថវិកាទាំងនោះ ទៅប្រើប្រាស់ដើម្បីគាំពារសង្គម ។ ទោះជាបែបនេះក្តី រដ្ឋក៏បានគិតគូរលើភាពចាំបាច់នានាដូចជា៖ ការដំឡើងប្រាក់ដល់និវត្តជន ដែលមានបៀវត្សរ៍ទាប និងការលើកទឹកចិត្តផ្សេងៗទៀត។
– សម្តេចតេជោ ហ៊ុន សែន ប្រកាសថា លទ្ធភាព នៃការដំឡើងប្រាក់បៀវត្សរ៍ជូនមន្ត្រីរាជការស៊ីវិល និងកម្លាំងប្រដាប់អាវុធ នៅឆ្នាំ២០២៣ អាចមាន តែរឿងមានកម្រិតណានោះ យើងមិនទាន់អាចបញ្ជាក់បាននៅឡើយទេ ដោយវាអាស្រ័យលើបញ្ហាសង្គមពេលនោះដែលយើងត្រូវដោះស្រាយ និងកត្តាកំណើតសេដ្ឋកិច្ចកម្ពុជាផងដែរ។
– សម្តេចតេជោ ហ៊ុន សែន ប្រកាសដោយសម្តែងភាពសប្បាយរីករាយនៅពេលរដ្ឋដកកាតព្វកិច្ចពាក់ម៉ាសតាមទីសាធារណៈទូទាំងប្រទេស តែប្រជាពលរដ្ឋនៅតែបន្តពាក់ម៉ាស ដើម្បីការពារសុខុមាលភាពខ្លួនឯង គ្រួសារ និងសហគមន៍។ សម្តេចប្រកាសលើកទឹកចិត្តដល់ពលរដ្ឋឱ្យបន្តពាក់ម៉ាស ទោះការពាក់ម៉ាស មិនមែនជារឿងកាតព្វកិច្ចទៀតក៏ដោយ។
– សម្តេចតេជោ ហ៊ុន សែន បានលើកឡើងដល់វិបត្តិសេដ្ឋពិភពលោក ដែលបណ្តាលមកពីសង្គ្រាមរុស្ស៊ី-អ៊ុយក្រែន ដែលសម្តេចបានមើលឃើញភាពហិនហោចសេដ្ឋកិច្ចពិភពលោក បន្ទាប់ពីពិភពលោក ទើបងើបបានបន្តិចពីជំងឺកូវីដ-១៩។ សម្តេចបានប្រដូចវិបត្តិសេដ្ឋកិច្ចពិភពលោកនៅពេលនេះ គឺស្មើនឹងវិបត្តិសេដ្ឋកិច្ចដែលបណ្តាលមកពីសង្គ្រាមលោកដូច្នោះដែរ។
– សម្តេចតេជោ ហ៊ុន សែន ប្រកាសលើកទឹកចិត្តដល់អតីតមេបញ្ជាអ៊ុនតាក់ ដែលសម្តេចមានជំនួបនៅទីស្តីការនាយករដ្ឋមន្ត្រីកាលពីម្សិលម៉ិញ ទៅទស្សនកិច្ច មើលការរីកចម្រើននៅតំបន់អតីតសមរភូមិចាស់រួមមាន៖ សំឡូត និងប៉ៃលិនជាដើម ដែលសម្តេចបានបញ្ជាក់ថា «នៅប៉ៃលិនពេលនេះ ក៏មានអគារខ្ពស់ៗ និងហេដ្ឋាចនាសម្ព័ន្ធល្អប្រសើរផងដែរ»។
– សម្តេចតេជោ ហ៊ុន សែន បានប្រកាសដល់ប្រជាពលរដ្ឋ និងអ្នកនយោបាយគ្រប់និន្នការឱ្យបន្ត រួមគ្នារក្សាសន្តិភាព ដែលយើងប្រឹងជំនះស្វែងរកដោយលំបាកលំបិនបំផុត។ «កុំពេលមានសង្គ្រាម ទើបស្រែករកសន្តិភាព»។
– សម្តេចតេជោ ហ៊ុន សែន បានប្រកាសពីយន្តការ នៃកំណើនសេដ្ឋកិច្ចកម្ពុជានៅឆ្នាំ២០៣០ ដែលជាសករាជថ្មី នៃកំណើនទំហំសេដ្ឋកិច្ច ក្លាយជាប្រទេសមួយដែលមានប្រាក់ចំណូល មធ្យម កម្រិតខ្ពស់ និងនៅឆ្នាំ២០៥០ ប្រទេសកម្ពុជានឹងក្លាយជាប្រទេសអភិវឌ្ឍន៍។
-សម្តេចតេជោ ហ៊ុន សែន បានប្រកាសពីដំណើរចេញទៅក្រៅប្រទេស ដើម្បីធ្វើជាសហប្រធានប្រជុំកំពូលអាស៊ាន-អាមេរិក និងទស្សនកិច្ចផ្សេងៗទៀតនៅបណ្តាប្រទេសមួយចំនួននៅអឺរ៉ុបនាពេលបន្តបន្ទាប់ ដោយសម្តេចប្រកាសមិនឱ្យមន្ត្រីជូនដំណើរ និងទទួលដំណើរត្រលប់វិញនោះទេ។
