សម្តេចតេជោ ហ៊ុន សែន ប្រកាសមិនចេញឃោសនារកសំឡេងឆ្នោត និងអំពាវនាវឱ្យបង្កបរិយាកាសល្អ សម្រាប់ការបោះឆ្នោត

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា បានប្រកាសមិនចេញមុខឃោសនារកសំឡេងឆ្នោតសម្រាប់ការបោះឆ្នោតក្រុមប្រឹក្សាឃុំ-សង្កាត់អាណត្តិទី៥នេះឡើយ ព្រមទាំងអំពាវនាវដល់អាជ្ញាធរពាក់ព័ន្ធរួមគ្នាបង្កបរិយាកាសល្អសម្រាប់ដំណើរការឃោសនារកសំឡេងឆ្នោត និងការបោះឆ្នោត ដោយបញ្ចៀសឱ្យបាននូវអំពើហិង្សាទាំងឡាយ។

ការបោះឆ្នោតជ្រើសក្រុមប្រឹក្សាឃុំ-សង្កាត់អាណត្តិទី៥ នឹងធ្វើឡើងនៅថ្ងៃទី៥ ខែមិថុនា ហើយយុទ្ធនាការឃោសនារកសំឡេងឆ្នោតសម្រាប់គណបក្សនយោបាយនានា នឹងធ្វើឡើងនៅថ្ងៃទី២១ ខែឧសភា ដែលមានរយៈពេល១៤ថ្ងៃ។ យុទ្ធនាការឃោសនារកសំឡេងឆ្នោត ជាពេលវេលាដ៏សំខាន់មួយសម្រាប់គណបក្សនយោបាយដែលបានចុះបញ្ជីចូលរួមបោះឆ្នោត ធ្វើយុទ្ធនាការស្វែងរកសំឡេងគាំទ្រពីប្រជាពលរដ្ឋ។

ក្នុងឱកាសអញ្ជើញជាអធិបតីសម្ពោធដាក់ឱ្យប្រើប្រាស់សមិទ្ធផលនានានៃគម្រោងការពារទឹកជំនន់ និងកែលំអប្រព័ន្ធប្រឡាយ-លូ ក្នុងរាជធានីភ្នំពេញ ជំហានទី៤ នៅព្រឹកថ្ងៃពុធ ទី២០ ខែមេសា ឆ្នាំ២០២២នេះ សម្តេចតេជោ ហ៊ុន សែន បានប្រកាសថា នៅថ្ងៃបើកយុទ្ធនាការឃោសនារកសំឡេងឆ្នោតនោះ សម្តេចនឹងអញ្ជើញទៅក្រុងដាវ៉ូស ប្រទេសស្វីស ដើម្បីចូលរួមវេទិកាសេដ្ឋកិច្ចពិភពលោក។

សម្តេចតេជោ ហ៊ុន សែន បានបញ្ជាក់យ៉ាងដូច្នេះ «ខ្ញុំមិនចេញឃោសនាសម្រាប់មេឃុំណាមួយនោះទេ ទុកឱ្យមេឃុំនោះនាំគ្នាធ្វើទៅ»។

ក្រៅតែពីការប្រកាសមិនចេញមុខធ្វើយុទ្ធការឃោសនាស្វែងរកសំឡេងឆ្នោតហើយនោះ សម្តេចតេជោប្រមុខគណបក្សនយោបាយធំជាងគេ និងកំពុងដឹកនាំរាជរដ្ឋាភិបាល ក៏បានប្រកាសអំពាវនាវដល់អាជ្ញាធរពាក់ព័ន្ធទាំងអស់ប្រឹងប្រែងបង្កបរិយាកាសល្អសម្រាប់ការធ្វើយុទ្ធនាការឃោសនារកសំឡេងឆ្នោត ដោយផ្តល់ឱកាសដូចគ្នាសម្រាប់គណបក្សនយោបាយទាំងអស់ទៅតាមច្បាប់ដែលបានចែង និងប្រឹងប្រែងបញ្ចៀសនូវអំពើហិង្សានានា។

សម្តេចតេជោ បានអំពាវនាវយ៉ាងដូច្នេះ «បរិយាកាសនយោបាយអព្យាក្រឹតពិតជាចាំបាច់នៅក្នុងដំណាក់កាលនៃការធ្វើសកម្មភាពឃោសនាបោះឆ្នោត ដែលអាជ្ញាធរគ្រប់លំដាប់ថ្នាក់ត្រូវតែបង្កលក្ខណៈសម្បត្តិឱ្យបណ្តាគណបក្សនយោបាយទាំងអស់មានសិទ្ធិដូចៗគ្នា»។

សម្តេចតេជោ បានសង្កត់ធ្ងន់ថា «បក្សកាន់អំណាច និងបក្សមិនកាន់អំណាចមានសិទ្ធិដូចគ្នា។ អាហ្នឹងហើយ គេហៅថា អព្យាក្រឹតភាពនៃរដ្ឋបាលស៊ីវិល នៅក្នុងដំណាក់កាលនៃការបោះឆ្នោត។ ធ្វើម៉េចឱ្យមានបរិយាកាសស្ងប់ស្ងាត់នៃការបោះឆ្នោត ដែលជាការប្រកួតប្រជែងមួយសម្រាប់ការគ្រប់គ្រងបន្តនៅឯមូលដ្ឋាន»។

សម្តេចតេជោប្រមុខគណបក្សប្រជាជនកម្ពុជា ក៏បានអំពាវនាវផងដែរ ឱ្យអាជ្ញាធរពាក់ព័ន្ធប្រឹងប្រែងបង្កបរិយាកាសល្អ ដើម្បីឱ្យប្រជាពលរដ្ឋបានចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដោយសេរី និងយុត្តិធម៌ទៅតាមច្បាប់ស្តីពីការបោះឆ្នោត។ សម្តេចតេជោ បានអំពាវនាវដូច្នេះ «អំពាវនាវឱ្យគ្រប់ទីកន្លែងទាំងអស់រក្សានូវកិច្ចខិតខំ ដើម្បីឱ្យប្រជាពលរដ្ឋបានចូលរួមបោះឆ្នោត និងជ្រើសរើសដោយសេរី ស្រឡាញ់បេក្ខជនណា បោះឆ្នោតឱ្យបេក្ខជននោះទៅ»។

បើទោះបីមិនចេញមុខឃោសនារកសំឡេងឆ្នោត តែសម្តេចតេជោ ហ៊ុន សែន រំពឹងថា ប្រជាពលរដ្ឋជាម្ចាស់ឆ្នោតនឹងមានការវិនិច្ឆ័យមួយដ៏ត្រឹមត្រូវទៅលើគុណតម្លៃ និងគុណសម្បត្តិរបស់គណបក្សនយោបាយ ដែលខ្លួនបានបោះឆ្នោតជូននោះ។

សម្តេចតេជោ បានបញ្ជាក់យ៉ាងដូច្នេះ «បងប្អូនប្រជាពលរដ្ឋអាចនឹងយល់បានហើយអ្វីទៅដែលគួរធ្វើ អ្វីទៅដែលមិនគួរធ្វើ? ពេលដែលគណបក្សប្រជាជននៅគ្រប់គ្រងអំណាចបងប្អូនទាំងអស់យល់ឃើញយ៉ាងម៉េច? រស់នៅបានយ៉ាងម៉េច? និយាយតាមមួយបែបខ្លីថា បើសិនជាគណបក្សប្រជាជនឈ្នះ ដឹកនាំប្រទេស នរណាក៏នៅជាមួយបានដែរ»។

សូមបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដែលនឹងធ្វើឡើងនៅថ្ងៃទី០៥ ខែមិថុនា ឆ្នាំ២០២២ខាងនេះ មានគណបក្សនយោបាយចូលរួមប្រកួតប្រជែងចំនួន ១៧គណបក្ស។ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានឱ្យដឹងថា ក្រុមប្រឹក្សាឃុំ-សង្កាត់ ដែលនឹងត្រូវបោះឆ្នោតជ្រើសមានចំនួនសរុប ១១,៦២២នាក់ លើឃុំ-សង្កាត់ទូទាំងប្រទេស ១,៦៥២៕