លោក Pacquiao ថានឹងបើកដៃឱ្យអន្តរជាតិ ស៊ើបអង្កេតសង្រ្គាមប្រឆាំង គ្រឿងញៀនរបស់លោក ឌូតើតេ, បើជាប់ឆ្នោតជាប្រធានាធិបតីហ្វីលីពីន

(ម៉ានីល)៖ អតីតស្ដេចប្រដាល់ និងជាបេក្ខជនប្រធានាធិបតីហ្វីលីពីន លោក ម៉ានី ប៉ាកគីអៅ (Manny Pacquiao) បាននិយាយថាលោកនឹងអនុញ្ញាត ឱ្យមានការស៊ើបអង្កេតអន្តរជាតិមួយ លើសង្រ្គាមប្រយុទ្ធប្រឆាំងគ្រឿងញៀនរបស់លោក រ៉ូឌ្រីហ្គោ ឌូតើតេ ហើយសន្យាបង្រ្កាបការជួញដូរគ្រឿងញៀន តាមមធ្យោបាយត្រឹមត្រូវ ប្រសិនបើលោកជាប់ឆ្នោតជាប្រធានាធិបតី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៦ ខែកុម្ភៈ ឆ្នាំ២០២២។

ការសន្យាខាងលើរបស់លោក ប៉ាកគីអៅ ធ្វើឡើងប្រាប់អ្នកសារព័ត៌មានបរទេស នៅក្នុងសប្ដាហ៍នេះ។ ថ្លែងនាឱកាសនោះ អតីតសេ្ដចប្រដាល់រូបនេះ បានអះអាងថាលោកនឹងស្វាគមន៍ការស៊ើបអង្កេតរបស់តុលាការព្រហ្មទណ្ឌអន្តរជាតិ (ICC) ប៉ុន្តែ នឹងនៅតែបន្តប្រយុទ្ធប្រឆាំងនឹងក្រុមឧក្រិដ្ឋជនជួញ ដូរគ្រឿញៀន ដោយប្រើវិធីសាស្ត្រត្រឹមត្រូវ តាមរយៈការបញ្ជូនជនសង្ស័យទាំងអស់ទៅកាន់តុលាការកាត់ទោសតាមផ្លូវច្បាប់។ «នៅពេលដែលខ្ញុំ និយាយពីមធ្យោបាយត្រឹមត្រូវ នោះគឺយើងនឹងមិនសម្លាប់មនុស្ស នៅតាមដងផ្លូវនោះទេ»។ នេះជាការបញ្ជាក់របស់លោក ប៉ាកគីអៅ។

គួរបញ្ជាក់ថា លោក ឌូតើតេ បានដកហ្វីលីពីនចេញពីតុលាការព្រហ្មទណ្ឌអន្តរជាតិ (ICC) កាលពីឆ្នាំ២០១៨ ក្រោយតុលាការមួយនេះប្រកាសបើក ការស៊ើបអង្កេតប្រឆាំងនឹងរូបលោក។ ការបោះឆ្នោតប្រធានាធិបតីហ្វីលីពីន គ្រោងនឹងប្រព្រឹត្តទៅខែឧសភាខាងមុខនេះ ប៉ុន្តែការស្ទង់មតិបច្ចុប្បន្ន បង្ហាញថាលោក ប៉ាកគីអៅ កំពុងតាមពីក្រោយបេក្ខជនប្រធានាធិបតី លោក ហ្វែរឌីណង់ ម៉ាកូស ជេ អ (Ferdinand Marcos Jr) ដល់ទៅ៥០ពិន្ទុ ឯណោះ៕