8 
បាល់ទាត់៖ ក្រុមឥណ្ឌូនេស៊ីបានប្រកាសដកខ្លួនពីព្រឹត្តិការណ៍បាល់ទាត់ជើងឯកអាស៊ាន AFF U23 Championship នៅទឹកដីកម្ពុជាហើយដោយសារផ្ទុះឆ្លងកូវីដ-១៩ នៅក្នុងក្រុម និងបញ្ហារបួស នេះបើតាមការប្រកាសរបស់សហព័ន្ធបាល់ទាត់ឥណ្ឌូនេស៊ី PSSI នាព្រឹកថ្ងៃសុក្រនេះ។ PSSI បានបញ្ជាក់ថា ការសំរេចចិត្តដកខ្លួនពីព្រឹត្តិការណ៍ដោយសារបញ្ហាពីរដោយទី១ គឺមានកីឡាករ ៧នាក់របស់ខ្លួនតេស្តវិជ្ជមានកូវីដ-១៩ រួមជាមួយនឹងមន្ត្រីក្រុមម្នាក់។
ជាមួយគ្នានោះដែរកីឡាករ ៤នាក់ផ្សេងទៀតត្រូវធ្វើចត្តាឡីស័កបន្ទាប់ពីមានការប៉ះពាល់ផ្ទាល់។ លើសពីនេះទៅទៀតក៏មានកីឡាករ ៣នាក់ផ្សេងទៀតកំពុងមានរបួសថែមទៀត។ ឥណ្ឌូនេស៊ីនៅសល់តែអ្នកចាំទីម្នាក់ប៉ុណ្ណោះគឺ Muhammad Riyandi ដែលកំពុងដាក់នៅដាច់ដោយឡែកផងដែរទោះមិនទាន់ឆ្លងកូវីដ-១៩ ស្របពេលដែលអ្នកចាំទីម្នាក់ទៀត Cahya Supriyadi តេស្តវិជ្ជមាន។ បញ្ហាទាំងអស់នេះបានធ្វើឱ្យគ្រូបង្វឹកលោក Shin tae-yong ស្នើសុំទៅ PSSI ដើម្បីលុបចោលការចូលរួមរបស់ក្រុមឥណ្ឌូនេស៊ី ហើយក៏បានសំរេចយល់ព្រមភ្លាមៗដែរពី PPSI។ សូមបញ្ជាក់ថា ព្រឹត្តិការណ៍បាល់ទាត់ជើងឯកអាស៊ី AFF U23 Championship នឹងចាប់ផ្តើមនៅថ្ងៃទី១៤ ខែកុម្ភៈដើមសប្តាហ៍ក្រោយនេះហើយ។ ឥណ្ឌូនេស៊ីស្ថិតក្នុងពូល B បន្ទាប់ពីដកខ្លួនមានន័យថានៅសល់តែបីក្រុមរួមមានម៉ាឡេស៊ី ឡាវ និងមីយ៉ានម៉ា៕
